Online Reporter
Nkosilathi Sibanda
INHLANGANISO yeZimbabwe Pickleball Association (ZPA) isithole ukubhaliswa ngokusemthethweni kuSports and Recreation Commission (SRC), okwenza yaba yinhlanganiso yakuqala eSouthern Africa ukwenza lokhu.
Umongameli wenhlanganiso le, uMthandazo Ngwenya uthe lokhu kulinyathelo elikhulu ekukhuliseni umdlalo we-pickleball kuleli.
“Lokhu kuyimpumelelo enkulu kithi ngoba kutsho ukuthi umdlalo we-pickleball ususemthethweni eZimbabwe. Sesizakwazi ukuwukhulisa ngendlela ehlelekileyo elizweni lonke,” kutsho uNgwenya.
Uthe impumelelo le izanceda ukuthi umdlalo lo ukhule ngamandla ngoba inhlanganiso isizasebenza labanye abathintekayo ngaphansi kohlelo lwePublic, Private and Communities Partnership (PPCP).
UNgwenya uthe abadlali beZimbabwe bazaya eSouth Africa ngoMbimbitho ukuyancintisana kuGauteng Open njalo kulamacebo okuthi kube lomqhudelwano phakathi kwamazwe womabili.
Uphinde wathi inhlanganiso ifuna ukuhlanganisa abadlali beZimbabwe abahlala phandle kwelizwe ukuze bakhe iqembu eliqinileyo.
“Siyakholwa ukuthi sizafika lapho esifuna khona ngoba siyakholelwa ukuthi uNkulunkulu ulathi kuloluhambo,” kutsho uNgwenya.
