Online Reporter
Nkosilathi Sibanda
UMDLALO we-pickleball uyaqhubeka usabalala elizweni njalo usufinyelele eMatabeleland South ngemva kokusungulwa kwenhlanganiso esemthethweni kulindawo lokwanda kwenani labadlali abavela emaphandleni.
Ekhuluma ngokwanda komdlalo lo, umongameli we-Zimbabwe Pickleball Association uMthandazo Ngwenya uthe ukusungulwa kweMatabeleland South Province Pickleball Association kulinyathelo elikhulu ekusabalaliseni umdlalo.
UNgwenya uthe isabelo sesitshengise intshiseko enkulu ngokubakhona kwamaqembu labadlali endaweni ezibalisela iFilabusi Kezi lePlumtree.
“IMatabeleland South iyisibonelo sokuzimisela kwethu ukuthuthukisa umdlalo. Isabelo lesi sesiveze ubukhokheli obuhle ekusabalaliseni umdlalo lokuhuga abadlali ukuthi ibe yingxenye yokuthuthukiswa kwe-pickleball,” kutsho uNgwenya.
Uphinde wancoma iqembu leSouth Forests eliseFilabusi, elingelinye lamaqembu aqalise ukuqhuba umdlalo esabelweni.
Ngokutsho kukaNgwenya, amandla lethalenta eliseMatabeleland South kubonakale emncintiswaneni weNational Pickleball Tournament nyakenye lapho iqembu lesabelo elenza kuhle kakhulu lincintisana lezabelo ezitshisayo emdlalweni lo.
“Ukubakhona kweqembu leMatabeleland South kwaba ngesinye sezikhathi eziqakathekileyo emncintiswaneni. Batshengisa ithalenta elikhulu, ukuzimisela lokulungela ukuncintisela loba yiziphi izicoco zelizwe.”
Lanxa kunjalo, uNgwenya uvumile ukuthi ukusilela kwenkundla ezifaneleyo zokudlalela lokuswelakala kwempahla yokudlala kuseyinkinga enkulu, ikakhulu emaphandleni.
Uthe indawo ezinengi kazikabi lenkundla eziqinileyo njalo izikolo lama-vocational centres zisadinga impahla yokudlala efana lama-paddles, umambule lamabhola.
“Sifuna ukufinyelela kuzo zonke indawo ukuze sivule amathalenta ezigabeni. Ukutholakala kwempahla yokudlala kuqakathekile kakhulu nxa sifuna ukukhulisa umdlalo emphakathini yonke,” kutsho uNgwenya.
UNgwenya uveze ukuthi kulamacebo okwenza umncintiswano weMatabeleland Community Shield Tournament, ongaphansi kohlelo lwenhlanganiso luka-2026.
Umncintiswano lo ukhangelelwe ukuhlanganisa abadlali abavela emaphandleni lakumadolobho amancane njalo uzasebenza njengendlela yokukhetha iqembu lesabelo.
“Umncintiswano lo wenzelwe ukufinyelela emphakathini njalo uvulele abadlali indlela ecacileyo esuka kumdlalo waphansi kusiya ekumeleni isabelolelizwe,” kutsho uNgwenya.
