‘I-Soweto Derby ayifani leminye imidlalo yePSL’

UMDLALI wasesiswini we-Orlando Pirates, uThabo Rakhale, uyavuma ukuthi ukutshaya kwabo yiGolden Arrows kumqhudelwano we-Telkom Knockout ngumuthi ebebewudinga njengoba bekhangelane lomdlalo we-Soweto Derby ngoMgqibelo.

Amabhakabhaka adlulele emzuliswaneni olandelayo kulandela ukutshaya i-Arrows nge-2-1 ngebhola elihlohlwe ngu-Mpho Makola kanye lelikaLuvuyo Memela.

Impumela le itsho ukuthi sekulokutshintsha kwezinto kuleliqembu njengoba bese lidlale imidlalo emithathu ilandelana lidlala ngokulingana, yize loba lingakatshaywa emdlalweni ye-Absa Premiership kulisizini.

URakhale uthi lokhu kunqoba kufike ngesikhathi esifaneleyo ngaphambili komdlalo lezitha zabo ezinkulu iKaizer Chiefs.

“Ukunqoba yinto ebesiyilwela emdlalweni we-Arrows, futhi besazi ukuthi i-Arrows izosinikeza umdlalo onzima, futhi bakwenzile,” kutsho lumdlali oleminyaka engu-26 yokuzalwa.

“Kulandela ukudlala kwethu ngokulingana imidlalo emithathu ilandelana yeligi, ukunqoba yinto ebesiyidinga, futhi sekunyuse umdladla kithi ngaphambi kwe-Soweto Derby ezayo.

“Vele iSoweto Derby ayifani nje lalabo yiwuphi umdlalo we-PSL kubadlali beChiefs lePirates, kanye labalandeli,” kuqhuba uRakhale.

Kusenjalo, iPirates ijike isinqumo ngejezi elaligqokwa uMeyiwa.

USihlalo wePirates u-Irvin Khoza wathi ijezi elingunombolo 1 ngeke liphinde ligqokwe kuleliqembu kulandela ukudlula emhlabeni kukaMeyiwa.

UMeyiwa watshona ngo-2014 ngemuva kokudutshulwa ekubo kwentombi yakhe eGoli.

Kuze kube manje amapholisa abengakabophi muntu ngokubulawa kwakhe.

Unozinti wePirates uBrighton Mhlongo, ngesizini edlule ubegqoka unombolo 16, kodwa emdlalweni wabo leAjax Cape Town ubegqoke unombolo 1 okuyinto ethuse abantu abanengi.

Okhulumela iqembu leBhakabhaka uFloyd Mbele uthe akukaze kutshiwo ukuthi ngeke liphinde ligqokwe leli jezi.