admin
Cornelius Luphahla
IZAKHAMIZI zesigabeni seChibila, eBinga zincwebisana igwayi ngenye indoda etshayise enye ngezulu bebanga ukuba inkunzi yomunye wabo yehlulwe ngeyomunye.
Lesi siga senzakale kuviki ephelileyo lapho uMnumzana Alfred Mumpande atshaywe khona lizulu ngemva kokuba inkunzi yakhe yehlule ekaMnumzana Pondi Mudimba qede wamsongela ethi kayiqedi iviki okudale ukuthi abantu bacabangele ukuba nguye omtshayise ngezulu. Intatheli ixhumane loMnumzana Luyando Dube walandisa ngokutshaywa kukaMpande lizulu wabuya wathi uMudimba ugange kakhulu.
“Kwathi kungeSonto ntambama kuviki ephelileyo inkunzi kaMumpande lekaMudimba zalwa eduze lesititshi sebhasi.
Kuthe ngesikhathi ibhasi ifika yama khonapho abantu babukela yasisehlulwa ekaMumpande. Ngemva kokwehlulwa kwayo uMudimba wazonda kakhulu wathi uMumpande uzazibonela kungakapheli iviki.
“Kuthe kungoLwesithathu izulu lathwala sezwa kuthiwa uMpande selimtshayile umhlubulo wanganxanye awusasebenzi. Lokhu kwasethusa kodwa mina ngahle ngabona ukuthi utshayiswe nguMudimba ngoba ngangikhona mhla emsongela,” kutsho uMnu Dube.
Esinye isakhamizi esithande ukuziveza ngokuthi nguMaNdlovu sithe laso sake satshayelwa izifuyo zaso lizulu ngemva kokuxabana loMudimba.
“UMudimba ugangile lami ngiyamazi ngakho nguye otshayise uMumpande ngezulu. Ngitsho ngoba lami ngake ngaxabana laye sibanga ukuthi inkomo zakhe zazidle amabele ami ngemva kwalokho uMudimba wathi ngizazibonela. Kuthe kunjalo akuphelanga nsuku ngaki inkomo zami ezintathu zatshaywa lizulu ngahle ngabona ukuthi nguye ozitshayisileyo,” kutsho uNkszn Ndlovu.
UNkosazana Girlie Nkomo umkaMnu Mumpande ebuzwa ngale indaba uvumile ukuthi umkakhe watshaywa yinkosazana athi kodwa kangeke abalise okunengi.
“Kuliqiniso sibili ukuthi umkami utshaywe lizulu kuviki ephelileyo kodwa kangikwazi ukuthi lathunywa ngubani izulu leli njalo ngeke ngikhulume ngalokhu ngoba ngisakhangele umkami ogulayo.
“Ukuthi inkunzi yalapha yalwa lekaMudimba liqiniso sibili ngoba lathi sazibona zisilwa kodwa kangikwazi ukuthi ngemva kwalokho kwahamba njani,” kutsho uNkszn Nkomo.
UMthunywa uxhumane loMnu Mudimba ecingweni wavuma ukuthi inkunzi yakhe yalwa lekaMpande wala ukuthi nguye owamtshayisa ngezulu.
“Kuliqiniso ukuthi inkunzi yami yalwa lekaMumpande yehlulwa kodwa kayisimi engamtshayisa ngezulu njalo kangilalo izulu lokutshayisa abantu,” kuveza uMnu Mdimba.
Inyanga eyisazi kwezamasiko uMnumzana Samson Sibanda ubikele intatheli ukuthi ukwehlulwa kwenkunzi abanikazi bebukele kuyabe kuchaza ukuthi umuzi womnikazi wayo kawuqinanga.
“Kungenzakala sibili ukuthi umuntu atshayise omunye ngezulu bebanga ukwehlulwa kwenkunzi ngoba ungabona inkunzi yakho isehlulwa ngenye lonke njengabanikazi libukele kuyabe kuchaza ukuthi umuzi wakho awuqinanga.
Ngezinye indlela kuyabe kufanele uyevuselela isikhonkwane sakho. Okuhle yikuthi inkunzi zehlulane lapho-ke kuyabe kubonakala ukuthi lingamadoda lonke,” kuphetha uMnu Sibanda.
Online Reporter