marble nkomo
Ethel Ncube
INGCITSHI kwezokulima sezixwayise abalimi ukuthi kulesi isigaba sokulima belime i-sugar beans ngoba zilenzuzo emangalisayo.
UMnumzana Edward Chikwaya ongu-Agricultural Extension officer kunhlanganiso ye-Zimbabwe Development Democracy Trust usekhuthaze abalimi ukuthi balime i-sugar beans ngoba zilenzuzo emangalisayo. Uthe i-sugar beans kazihluphi ukulima.
“I-sugar beans kazihluphi ukulima njalo zilinywa ngoZibandlela kusiya cina ngoNhlolanja. Sikhuthaza abalimi ukuthi beqale belungise umhlabathi bengakahlanyeli,” kutsho uMnu Chikwaya.
Uqhubekele phambili wathi ukhuthaza abalimi ukuthi nxa sebehlanyela beqale ngokufaka umquba.
“Sikhuthaza abalimi ukuthi nxa behlanyela beqale ngokufaka umquba okuthiwa nguCompound D bewuhlanganise lonhlabathi ukuze izilimo zabo zikhule masinya. Abalimi sibakhuthaza ukuthi nxa sebehlanyela begebhe amagodi angaba yi 2 kusiya ku-5cm ukutshona,” kutsho uMnu Chikwaya.
Uthe i-sugar beans kaziphuzi ukuvuthwa.
“I-sugar beans kaziphuzi ukuvutha njalo zithatha inyanga ezintathu ukuthi zivuthwe zibe seziqalisa ukuvunwa,” kutsho uMnu Chikwaya.
Uthe i-sugar beans zilezibungu ezinlutshwane njalo ukhuthaza abalimi ukuthi bazifafaze.
“I-sugar beans zivame ukuhlaselwa yizibungu ezigoqela ama aphids njalo sikhuthaza abalimi ukuthi bafafaze izilimo zabo ngemithi etholakala ezitolo ezithengisa imithi edolobheni,” kuphetha uMnu Chikwaya.
Online Reporter