Online Reporter
Lovemore Dube
UMQEQETSHI weHighlanders uBenjani Mwaruwari usetshengise ukuthi uzimisele ukuthi abumbe iqembu eliqinileyo nanko usehambise abadlali eBotswana, lapho ahlose ukuthi afike abalolonge khona ngokuqinileyo.
Iqembu lizalolonga okweviki.
Kunengi okukhangelelwe kuHighlanders kulisizini yeCastle Lager Premiership ngenxa yosekelo lwemali olukhona lonyaka. Iqembu lilomqeqetshi omutsha okhulele koBulawayo wadlala kumaqembu abasakhulayo kuBosso ngo 1994-1996. Kukhangelelwe ukuthi ingenza ngcono lonyaka lapho ezafikisa khona iminyaka elikhulu lokhe yasungulwa.
UMwaruwari ukufakazile kuMthunywa ukuthi uzathi phetshe, achaphe umfula uRamokgwebana ayefika edolobheni leGaborone.
Bazagijima njalo babuye badlale imidlalo engaba mibili kumbe mithathu besebephenduka ngoLwesithathu oluzayo.
“Siya eBotswana ukuyalungiselela sikhonale. Silethemba lokuthi konke nje kuzahamba kuhle sikhangelane lo2026,” kutsho uMwaruwari.
UMwaruwari uzibambe lonyaka ngemva kokufundela ukuqeqetsha lokuba lezithupha zaphetsheya.
Umqeqetshi lo useke wabamba intambo kuNgezi Platinum esekelwa nguBongani Mafu kodwa akuzange kuhambe kakuhle kuleliqembu.
Ekuqaleni kwalumnyaka umenywe ngusomabhizimisi wodumo uWicknell Chivayo, othe nxa engabuya ekhaya uzamenza abengumqeqetshi weHighlanders, amholise njalo abuye amthengele lemota, aphe iqembu imali yokuthenga abadlali.
EBotswana, iHighlanders ikhangelelwe ukuthi izadlala lamanye amaqembu akulelo. UMwaruwari uzaqinisa njalo ibhentshi labaqeqetshi elilomsekeli wakhe uMkhokheli Dube lo Malvern Moyo oqeqetsha onozinti.
IHighlanders ilahlekelwe ngabadlali abambalwa kumnyaka odluleyo njalo kukhangelelwe ukuthi ingavala izikhence lezi ngoKudakwashe Mahachi, Lawrence Mhlanga, Shelton Moyo loSherperd Mhlanga.
Umaneja weqembu, uZenzo Moyo uzabe eleqembu eGaborone. Bobathathu badlala phetsheya, ngakho kulethemba lokuthi bazanikeza ubukhokheli lolwazi kubadlali, okuzadala ukuthi kuguqule izinto eqenjini.
