admin
YiNtatheli kaMthunywa
IHIGHLANDERS FC iwelwe yinhlanhla yamaswazi kulandela ukuphiwa kwayo isipho sempahla yokugqoka ngabalandeli bayo abazibiza ngokuthi yiBosso Vibes.
Ekhuluma ngesikhathi sokunikeza ezikaMagebhula usekelo lolu, uMlamuleli Phiri ubike ukuba yena labanye bakhe babone kufanele ukuthi banike iqembu isipho lesi ngoba bebone abadlali belolonga bengagqokanga amabhibhi.
“Silapha njengeBosso Vibes ukuzonika iqembu isipho samabhibhi ngoba sibabone belolongela umdlalo weChicken Inn bengagqokanga amabhibhi,” kubika uPhiri.
Owemukele lesi sipho uCosmas “Tsano” Zulu obemele umaneja uVezigama Dlodlo, ubike ukuba abalandeli abaqotho beBosso babonakala ngokwenza izimanga eqenjini hatshi ngokuthi uzibani akaphume kuqembu.
“Abalandeli uqobo sibabona ngokwenza kuhle hatshi ngokutshela abaqeqetshi okokwenza mayelana lokukhethwa kwethimu,” kubika uZulu ophinda abengumqondisi webhentshi labaqeqetshi.
Linkulumo kaZulu iza kulandela ukukhonona kwabalandeli bakaMantengwane ukuthi kulabadlali abangamelanga bagqoke ijesi yeBosso ngoba bengaliboni ibhola.
Omunye wabadlali okhanya engasekho enhliziyweni zabalandeli beTshilamoya uSimon Munawa yena okukhanya engena ngenxeba kuleliqembu usolwa ngabalandeli bathi mhlawumbe nguye othwele “umuthi” wethimu le.
UZulu ubike ukuba abalandeli abafunde ngomdlalo wenguqu ngokusekela abaqeqetshi.
Umqeqetshi weqembu okhanya laye esephethe emlonyeni uErol Akbay ubike ukuba akalani lokuthi uMunawa wehlulekani kodwa ukhangelele ukuthi wenelisa ukwenzani.
Iqembu leli likhanya lingelamdlali wesiswini ongenelisa ukunika kuhle abagadli njalo adinge ibhola enzikini kulandela ukuchaywa abakwenziwayo yiChicken Inn okwakusobala ukuthi kulapho ithimu le efe khona noma nje ibhentshi leBosso likutshaya indiva lokhu.
Online Reporter