admin
Johas Moyo
KULENINA lakoMathambo eKwekwe elizibulele ngemva kokwaliwa lijaha ebeselithandane lalo okweminyaka emibili.
Umuyi uPrisca Dube wenze ihlazo leli kuviki ephelileyo.
Kubikwa umuyi eseyalwe lijaha lakhe wanatha umuthi wotshinda owenza wahle waya kogoqanyawo.
Esinye isakhamuzi esikhulume loMthunywa uMnumzana Melusi Ndlovu ubikele iphephandaba likazulu ukuthi umufi utshiye incwajana lapho abeveza ukuthi uthethe impilo yakhe ngoba eyalwe lijaha.
“Ngadana kakhulu ngisizwa indaba yokufa kukamuyi. Okubuhlungu kakhulu yikuthi ubengumntwana ohlala ezithulele okwenze kwabanzima lokuthi abangane bakhe babone ukuthi kukhona okumhluphayo emoyeni wakhe.
Ufe esasemncane njalo kenelisanga ukuthi avalelise,” kutsho uMnu Ndlovu.
Esinye njalo isakhamuzi esingathandanga ukuqanjwa ngegama sibike ukuthi umuyi ubengaphathekanga kuhle kulezonsuku.
“Umntwana lo kukhanya kulomoya ophezu kwamandla akhe oyiwo omenze wenza ihlazo leli ngoba nyakenye ukhona njalo omunye owazihilelayo emulini le,” kutsho umakhelwane lo ongathandanga ukuqanjwa.
UMthunywa uxhumane lelinye ilunga lemuli yakoDube, uMnumzana Thabani Tshuma obike ukuthi balokhe bemadolo nzima ngesehlakalo lesi.
“Kangilamathe ngesihluku lumntwana azenze sona. Kunzima kithi njengemuli ukwamukeka ukulahlekelwa okungaka. Lokhu kungabe kubangelwa ngumoya omubi osusenza abantwabethu bazibulale ngoba umnyaka ophelileyo omunye olandelana lalo uzibulele laye.
“Sikhangelele ukuya emhlahlo siyedingisisa ukuthi kungabe kungene moya bani egumeni osuqede abantwabethu,” kutsho uMnu Tshuma.
UMthunywa kenelisanga ukuxhumana loKhansila ngoba ucingo lwakhe lungangeni.
Online Reporter