Online Reporter
Zimpapers Sports Hub
UKUKHULUMA ngoHonour Gombami loVusumuzi “Sgcebhe” Nyoni kukhumbuza abalandeli beHighlanders ngesikhathi kusasemnandi ukubukela inguqu eBarbourfields.
Bobabili babephakathi kweqembu elalilethalenta elimangalisayo. KwakuyiBosso leyo, eyenza inengi lakholwa ukuyilandela.
Laba ngabadlali abatshiya beyakhile kuleliqembu, bedlala ngokuzikhadla baze babonwa ngamaqembu aphetsheya.
Kuliviki baphakamise lefulegi yeHighlanders, bethola inhlonipho kuqembu leCercle Brugge kweleBelgium, iqembu ababelidlalela.
Bangeniswe enkundleni ebigcwele phamu ngabalandeli beCercle Brugge, phambi kokuba kudlalwe leqembu leKortrijk. Babongwe ngomsebenzi wabo omuhle wokuphakamisa iCercle Brugge ngesikhathi besayidlalela.
UGombani uthe uzizwa emanzi te.
“Siphakanyisiwe ngokunxuswa enkundleni sisethulwa phambili kwabalandeli enkundleni yeqembu. Ngijabulile ngenhlonipha engaka. Sibongwe ngokudlalela iqembu,” kutsho uGombami, ekhuluma lentatheli yeZimpapers Sports Hub.
UGombami wadlalela iCercle Brugge amasizini amahlanu waselimala mhla bedlala leRC Genk. Kwadlula inyanga ezilitshumi lanhlanu ukuze aphenduke emdlalweni. Utshiye inguqu ngesizini ka2016.
Wacathula kunguqu kumaqembu ayedlala kumaligi abadlali abasakhulayo koBulawayo, wasuka lapho wakhuphukela kuDivision Two, andubana ayekuHighlanders.
Wafika kuBosso wahlangana labanye abalethalenta abagoqela uCharles Chilufiya loRichard Choruma asebadlula emhlabeni.
Uchazwa njengomdlali owayekhaliphile, ereyitsha aphinde ahlohle. Ubalwa njengo-linkman owaba yingcitshi ukwedlula abanengi ngesikhathi sakhe.
