Online Reporter
Ugwalo: Emfuleni wezinyembezi olwalotshwa ngu Ezekiel S K Hleza
Ophezulu Stinta
Ngeviki edluleyo sitshiye amalungiselelo okuhlasela esezingeni eliphezulu okwamagama, inhlangothi zombili zazihlome ziphelele, wonke enxibe avatha ngazo zonke ezempi.
EkaMgandane yayisibiye yaphelela yavala inkamba yayo. Lapha-ke yayisifunga ngegazi ekaMgandane ingangabazi ngelithi kwakuzahlanganwa kuchitheke igazi, kukanti ngamajaha ayegqize aphelela ngamasongo egazi egqizele ukuhlangana lamabhunu kugeleze umfula wegazi.
Siqhubeka lodaba lwethu lwempi lapho esatshiya kusigaba samalungiselelo okuhlasela esezingeni eliphezulu okwamagama, inhlangothi zombili zazihlome ziphelele wonke enxibe avatha ngazo zonke ezempi. EkaMgandane yayisibiye yaphelela yavala inkamba yayo. Lapha-ke yayisifunga ngegazi ekaMgandane ingangabazi ngelithi kwakuzahlanganwa kuchitheke igazi, kukanti ngamajaha ayegqize aphelela ngamasongo egazi egqizele ukuhlangana lamabhunu kugeleze umfula wegazi. Lapha-ke kwasekusifa ofayo kusala osalayo, injalo impi.
Singena kusahluko setshumi lambili. Sihlangana loMaMoyo ehlezi loMaNyathi, bazihlalele nje emkulwini, inyembezi zazingabuzwa. Wakhala umMaMoyo kwahela ukuthi kanti kuyini okungaka akonayo sengaze afelwe ngabantwana ngendlela ebuhlungu kangaka besifa ngombhobho okwamabhubesi. Kanti wazala abantwana pho kumbe abanye babona inyamazana omabona abulawe.
Kusephakathi nje wangena umalukazana wakhe engagqize qhakala. Wakhuluma amazwi agwaza inhliziyo ngelithi uninazala wazala izigebengu, kambe wayengela ngitsho unembeza ukuthi omunye walowo ambiza ngelenswelaboya ngumyeni wakhe. Kanti pho wayevele emthanda okweqiniso na kumbe kwakuluthando lwendlela, kambe nxa sekuqakama inzondo engaka kungala lutho oluthinta umuzi wabo ngaphandle kokuthi nje umntakaMaMoyo waphuma wayalwela inkululeko wayalwela ilizwe, yikho lokho okwasekungenza ukuthi ahlamukelwe ngunkosikazi.
Yinsindabaphenduli-ke ngoba kukhanya umalukazana kulomuntu axoxa laye exhibeni lapha bevumelana ngelamagandanga, kulomuntu ongaziwayo lapha endlini ozwakala ebuza ukuthi nguye unina wamagandanga lo, kusobala yingxoxo ende, esegudwini kodwa phela lo owesifazana ukhuluma ngomyeni wakhe.
Ababili laba bazwakala beqhakala uhleko olumangalisayo, ngemva kwamazwi athi sizawaqeda amagandanga. Kutsho lumuntu wayezimisele ukubulala izihlobo zalapha ekhaya, isimanga-ke uphakathi kweguma lalabo bantu afuna ukubaqeda, kanti pho yinto ethiwani le.
Ngempela ukhona oyisiwula lapha kumbe nje bonke yiziwula zokucina. Kambe kulabantu abangazoxoxa ngokubulala abantu phakathi kweguma labo, lokhu njalo kuveza indelelo ephezulu kakhulu, indelelo eswela ukukhalipha.
