Online Reporter
Brandon Moyo
UMDLALO we-golf kuleli usufinyelele amazinga aphezulu nxa kuqathaniswa leminye iminyaka edluleyo, ngokutsho kukamongameli weZimbabwe Golf Association (ZGA) uMartin Chikwana.
UChikwana utshele iZimpapers Sports Hub kuliviki ukuthi ukukhula kwe-golf kuleli kubonakele ngendlela umncintiswano we2025 FBC Golf Open othole ngayo usekelo kubadlali abasuka kwamanye amazwe ase-Africa laphetsheya.
I-FBC Zimbabwe Open idlalwe ngeviki edluleyo enkundleni yeRoyal Harare. Intshantshu yomncintiswano kube nguLuis Carrera oweMexico.
UChikwana uthe ukuzimisela kwabadlali bakwamanye amazwe kutshengisela ukukhula komdlalo kuleli. Uncome indlela uCarrera adlale ngayo, wathi kutsho ukuba loba ngubani engawunqoba umncintiswano.
“Umncintiswano we2025 FBC Zimbabwe Open siwuqhube kakuhle. Bancintisane ngokukholisa abadlali. Bekumnandi. Lonyaka kube lotshintsho nanko umncintiswano unqotshwe ngumdlali ongayisuye oweSouth Africa.
Unqotshwe ngovela eMexico, okuveze ukuthi loba ngubani engawunqoba umdlalo.
“Lokhu kuveze njalo lokuthi umdlalo wethu uyakhula. Kufake iZimbabwe endaweni yawo, phakathi kwamazwe ahlonitshwayo kumdlalo we-golf. Sibonga njalo labalandeli bomdlalo abaze ukuzobukela IFBC Open lonyaka.
Kabaqhubeke bekwenza lokhu,” nguChikwana lo.
Umdlali wokucina ukunqoba iZimbabwe Open le kwaba nguMark McNulty ngo2000.
UCarrera, owaba yintshantshu yeSunshine Tour Qualifying School ngoMabasa, ulilobele imbali enhle lonyaka ngokunqoba kumqhudelwane obusekelwe ngemali libhanga leFBC Bank.
Ekunqobeni kwakhe wehlule u-Austin Bautista.
UCurrera uthe: “Ngibona iSunshine Tour ngoba sengiphakathi kwayo njalo ngiyayithanda. Ngiphinda ngengeze njalo isibongo sami kwabeZimbabwe Open lezisebenzi zonke. Kuyabongeka elikwenzayo.
