Online Reporter
Raymond Jaravaza
INHLANGANISO yemitshova eyeBulawayo United Public Transport Association (BUPTA), isibike ukuba akusavunyelwa ukuthwala kwama-gas cylinder ezimoteni zayo.
Isinqumo lesi sithethwe ngemva kokuba omunye umtshova osuka enzikini yedolobho usiya eMbizo utshe waphela, okubikwe ukuba kudalwe yikudubuka kwe-gas eyayiphakathi.
Umtshayeli, uwindi labo bonke abakade begadile, baphume bengalimalanga.
Umgcinisihlalo weBUPTA, uMorgan Msipa, uthe bonke abanikazi bemitshova sebetsheliwe ukuthi abatshayeli labowindi bengavumeli loba ngubani ongena emtshoveni ephethe i-gas cylinder kumbe amafutha okuhambisa izimota.
“Sibe lesehlakalo esibuhlungu lapho umtshova omutsha wohlobo lwe-Toyota Quantum utshe waphela ngemva kokuba i-gas cylinder ebingaphansi kwesitulo ilumathise umlilo.
“Sinqume ukuthi kusukela khathesi kungangeni muntu ophethe i-gas loba amafutha ezimota emitshoveni yethu ngoba kuyingozi enkulu. Sizajezisa bonke abephula umlayo lo,” kutsho uMsipa.
Isiphathamandla seBulawayo Fire Brigade, uMhlangano Moyo, usekele lesi isinqumo.
“Sixwayisa uzulu ukuthi ayekele ukuthwala i-gas ezimoteni zomphakathi ngoba kubeka impilo zabanye engozini enkulu. Izinto ezinjalo kumele zithwalwe ngezimota ezikhethekileyo kuphela,” kutsho uMoyo.
Isixwayiso lesi silandela njalo enye ingozi eyenzakale eGweru ngoNtulikazi lapho okwafa khona abantwana besikolo abayisikhombisa ngemva kokuba umtshova owawubathwele utshile ngenxa yephethulo eyayiphakathi.
