Online Reporter
IKAIZER Chiefs iphunyukwe lithuba lokubhekana le-Orlando Pirates itshayela phezulu ngokwehlulwa yiStellenbosch FC emdlalweni weBetway Premiership eFNB Stadium, eNasrec, ngoLwesibili ebusuku.
IChiefs ihambe phambili ngokuhlohla lapho uFlavio da Silva eligaxe entanjeni kusigaba sokuqala emdlalweni obekubukeka izawunqoba ngendlela ebigeleza ngayo. Lokho bakucitshe konke uLangelihle Phili loDevin Titus betshayela iStellies amabhola esigabeni sesibili.
Ngaphandle kokuthi iChiefs iphunyukwe lithuba lokwenyukela endaweni yesithathu kulogu yePremiership, ukunqoba bekuzayenza ibhekane lePirates emdlalweni wabomkhaya eFNB Stadium ngoMgqibelo ilomfutho. IPirates isazikhotha amanxeba kulandela ukukhala ngaphansi kuCasric Stars emdlalweni we-Last 16 yeNedbank Cup ngempelaviki edluleyo.
Lokhu kutsho ukuthi ilengcindezi yokwehlula iChiefs ukuze izobuyisa ithemba kubalandeli kwazise isitshaywe emidlalweni emibili ilandelana. Ngemuva kowehlulwa yiStellies, umqeqetshi weChiefs uKhalil Ben Youssef, uthe bekufanele baqede ngeStellies esigabeni sokuqala.
“Nxa uwuphethe umdlalo esigabeni sokuqala, kumele uqede. Nxa ungakwenzi lokho, kumele ukwenze kwesesibili. Ngicabanga ukuthi kumele siwavume amaphutha kwesinye isikhathi. Kufanele sixolise kubalandeli.
“Silezinsuku ezintathu ukucabanga ngomdlalo olandelayo. Nxa uthola amathuba ayisikhombisa uwakhutha wonke, ngitsho kungekho muntu epalini uhlulwa yikutshaya ibhola, sizokwenzani emuva kwalokho?” kutsho uBen Youssef oqeqetsha ngokubambisana loCedric Kaze.
Laba baqeqetshi bazahlala ebhentshini kowabakhayo okokuqala engasekho uNasreddine Nabi abebengabasekeli bakhe. Ngesikhathi iChiefs icina ukubhekana lePirates emdlalweni wamanqamu weNedbank Cup ngoNkwenkwezi, inqobe nge-2-1.—Isolezwe
