Online Reporter
UPUTCO Mafani, owayengumxhumanisi weKaizer Chiefs labalandeli eminyakeni edluleyo, ukholwa ukuthi ukuqhelelana phakathi kwabalandeli beqembu yikho okubadalela intukuthelo.
UMafani wayekhona ngezikhathi zenjabulo kuChiefs, aziwa ngokuhambela abalandeli lokugida enkundleni. Ngaleso sikhathi yayinqoba izicoco iphindelela. Abanengi basamkhumbula ngesiqubulo sakhe i-Operation Vat Alles (thatha zonke) ngesikhathi iChiefs inqoba iMandela Cup (Caf Confederation Cup), iBP Top 8 leCoca Cola Cup ngo-2001.
Kwabanye usahlezi ezinhliziyweni ngenxa yeculo aliqamba ngomgadli weZambia, uCollins Mbesuma, elalisithi “Mbesuma Bemlandela’’ ngenxa yokuqhulula kwakhe amabhola ngesizini ka-2004/2025. Ngaleyo sizini iChiefs yanqoba iligi.
UMafani wayehambela ingatsha zabalandeli, ebafundisa ngokuziphatha lokubaluleka kokuba ngumlandeli waMakhosi, elalela lezikhalazo zabo.
Umsebenzi wokuzifikela ngqo kubalandeli wacina ngoMafani kuChiefs. Kukhona abalandeli abasakukhalela lokho ngoba kwakubanika inkundla yokuzwakalisa izikhalazo zabo eqenjini. Ukudinwa kwabo sebekuveza enkundleni ngokutshaya abaqeqetshi lokuhhewula abadlali.
NgoLwesine iPremier Soccer League (PSL) iphinde yahlawulisa iChiefs ngesehlakalo sokuphosa izinto enkundleni esenzeke ngesikhathi ibhekane le-Orlando Pirates, ngenyanga edluleyo.
“Ngizwa ubuhlungu njalo nxa abalandeli besenza lokho. Kumele ngabe kulula manje ukuxhumana labo ngoba sekulobuxhakaxhaka, lezinkundla zokuxhumana. Kodwa akumelanga zithathe umsebenzi wabaxhumanisi babalandeli lamaqembu.
“Ukuphosa amambhodlela kwabalandeli kutsho ukuthi kukhona ukuqhelelana phakathi kwabo leqembu.
Ngebhadi ebholeni lakhathesi eSouth Africa uyabona ukuthi abasayingeni eyama-PRO. Ngokwami kuliphutha elikhulu ngoba kulezinto ezintathu empilweni yethu eSouth Africa okuyipolitiki, ibhola, lenkolo ongeke uphumelele kuzo ngaphandle kokuzifikela ebantwini ngqo.
“Loba kulekhasi le-Facebook, lele-Tik Tok lokunye kodwa ungayekeli ukuyabona abalandeli, ukhulume labo ngenhlonipho lozwelo ikakhulu nxa iqembu lingenzi kahle.
“Isiqubulo esithi ‘love and peace, sikhulu. Nxa uphakamisa imbhodlela, utshaya umsizi kanompempe, ufana lomuntu okhumula isikipa asitshise emlilweni. Iqembu lakhiwe ngalezo zimiso zokuthula loxolo.”
Uthe: “Nxa siphakamisa ukuthula loxolo, siphakamisa abadlali, siphakamisa abaqeqetshi. Kodwa nxa sitshengisa ukuthukuthela okuyisimanga, labo sesiyabancindezela. Zikhona impawu zokuthi iqembu liyalunga.
“Ngiyacela kuMakhosi Amahle ukuthi sihlale ngokuthula loxolo. Akumnandi ukudliwa kodwa ngicabanga ukuthi kufuna ukubekezela kwethu lokuthembeka okuzabuyisa iqembu.”
