Online Reporter
Ethel Ncube
ZISELE zinkemile izakhamizi zeKasamara eGokwe ngemva kokuba enye indoda ithe izama ukutshaya umkayo ngehloka wavika yayatshaya umntwana oleminyaka emine ekhanda wahle wedlula emhlabeni kubangwa ukujola.
UPrecious Nyamadzawo oleminyaka emine yokuzalwa ufe ngemva kokuhlahlelwa ngehloka nguyise, uThomas Nyamadzawo ezama ukutshaya umkakhe uEunice Mawisa.
Kubikwa uMawisa laye usele elamanxeba ekhanda.
Kubikwa mhlaka 19 kuyonale inyanga ebusuku, umamangala wathi elele loPrecious, umetheswacala uThomas onguyise womntwana wafika wathi kunkosikazi wakhe kasamfuni, kahambe ngakibo.
Umamangala wala ukuhamba ngoba kwakusebusuku kanti yayisiwuchithile umuthi inkonyane, uThomas wadobha ihloka efuna ukutshaya umkakhe wamkhutha.
Umntwana wezwa unina ehlaba umkhosi wavuka weqela esifubeni sikamama, uThomas wakhutha ukutshaya umkakhe wayatshaya umntanakhe wadabuka ikhanda waqhubeka elokhe emtshaya engaboni ukuthi utshaya umntwana, uthe ngemva kwesikhathi waphendukela umkakhe wamtshaya waze wawela phansi.
UEunice wenelisa ukuvuka ngemva kwesikhathi wagijima ethwele umntanakhe wayacela usizo komakhelwane umkakhe wamlandela bafika balamula.
UThomas wabaleka wangena iganga, kuthe ngosuku olulandelayo izakhamizi zavuka zancedisana ukumdinga zathola eselele phansi esezama ukuzibulala nanko wayesenathe umuthi wokubulala izibungu.
Amapholisa abizwa athatha isidumbu somntwana asisa esibhedlela seGokwe ikanti ubaba lomama balaliswe esibhedlela lapho abelatshwa khona.
Intatheli ixhumane lesikhulumi samapholisa eMidlands uInspector Emmanuel Mahoko obike ukuba indaba enjalo isezandleni zamapholisa.
“Indaba enjalo yenzakele, ubaba obulele umntanakhe ezama ukutshaya unkosikazi wakhe. Sicela uzulu nxa engaba lohlupho adinge omunye umuntu ongamncedisa ukuxazukula uhlupho alalo abantu bekele ukusebenzisa ubudlwangudlwangu,” kubika uInsp Mahoko.
