adminYiNtatheli kaMthunywa
UKUSWELA izicathulo zokukhaba ibhola akusoze kwenqabele abafana besikolo seChinonge eBinga ukuthi bamele isabelo seMatabeleland North kumncintiswano weCopa Coca-Cola.
Isikolo lesi sithi sikhangelele ukufinyelela kumdlalo we-final, sibe ngesokuqala ukuletha inkezo yodumo le eMatabeleland North.
Isikolo lesi senza isimanga ngomnyaka ophelileyo ngokuba ngesakuqala esivela eBinga ukudlala kuma-finals eCopa Coca-Cola.
Inengi labadlali balo alilangitsho lezicathulo zokukhabisa.
IChinonge yadibana lentshantshu ezivela kwezinye izabelo ku-final eyaqhutshwa esikolo eZimbabwe Grounds eHarare ngo2014.
Isikolo seBinga lesi sibambisana umango leMzingwane High emele isabelo seMatabeleland South kanye leMzilikazi High yakoBulawayo.
Isikhulumi seNational School of Heads (Naph) esabelweni seMatabelelend South uMorgan Moyo ubikele iphephandaba likazulu ukuthi akulamehluko omkhulu okhona emncintiswaneni walonyaka ngoba amaqembu avele ezingcitshi kumncintiswano lo alokhe esesidukwini.
“Siyaziqhenya ngesabelo sethu seMatabeleland South njalo sikhangelele ukuthi abafana bethu beMzingwane baphenduke lenkezo ekhaya ngoba beligiqa kamnandi. Silethemba lokuthi sizenza kuhle emncintiswaneni walonyaka,” kutsho uMoyo.
Abafana beMzingwane babezintshantshu zomncintiswano weCopa Coca-Cola ngomnyaka ka2012.
Isikolo seChemhanza High School yiso esanqobayo ngomnyaka ka2013 sahamba lenkezo ekhaya njalo sizabe sikhangelelwe kakhulu emncintiswaneni walonyaka.
Isikolo seChemhanza sizadibana le Pamushana kuGroup A kuthi iMzingwane yona ibhuqane leChurchill kuGroup D kuncintiswano lo.
Online Reporter