Icula sanyoni yezulu Indumiso Gospel Choir

BakaMthwakazi iphephandaba likazulu lize lazo njalo ezimnandi elidume ngazo.

Kule iviki liphethe ingadlangadla yeqembu lezomculo wezokholo Indumiso Gospel Choir iqembu elidabuka kweleTsholotsho. Kaliculi nje leliqembu lenza izimanga.

Angithi nje omunye wenkokheli zaleliqembu nguCharles Maphosa indoda engena kuwe amadimoni.

Othanda ukuba senkosini kuliviki nanti ithuba kahlangane lengxoxo le enambithekayo phakathi kwentatheli yephephandaba likazulu uCornelius Luphahla (CL) lendodamdabuko uCharles Maphosa (CM).

CL: Akutsho mfokaMaphosa mayelana lembali yakho kanye leyeqembu lenu.

CM: Mina ngazalelwa esigabeni seMbiriya eTsholotsho ngabuya ngakhulela khona. Izifundo zami zikaGiredi 1 kusiyakuma kuGiredi 7 ngazifunda eMbiriya Primary School.

Kwathi ngo1998 ngayangena uFomu 1 eSithathawa Secondary School eTsholotsho njalo.

Ngathi ngemva kokuqeda uFomu 4 ngayahlala koBulawayo lapho engaqhubeka khona ngezifundo zami ngasengisekela endleleni ngayadinga umsebenzi kweleSouth Africa.

Ukucula ngaqala ngesikhathi ngisafunda lapho engangicula khona kuma-choir esikolo ngacina sengisungule iqembu lami lembube elalicula ezikolweni.

Ngaqhubeka ngokucula ngasengicula ebandleni leTwelve Apostolic Church of Christ lapho ebengiku-choir khona njalo.

Kwathi ngo2015 sabona kungcono ukuthi sisungule elethu iqembu lokucula ngilomngane wami uTobias Zitha kanye labanye abangane bami.

CL: Kungani lakhetha ukucula umculo wezokholo njengoba imihlobo yemiculo iminengi kangaka?

CM: Okwenza sakhetha umculo wezokholo yikuthi sananzelela ukuthi iziphiwo zethu sonke zigxile kwezokholo.

Ngalokhu-ke ngabe sacula omunye umculo ongayisiwo wokholo sasingeke saya ndawo ngoba abantu babengeke basemukela ngendlela ephakemeyo njengale abasemukela ngayo.

CL: Umphakathi uthanda ukwazi ukuthi njengeqembu elisasungula selakhipha amadlalade amangaki?

CM: Njengoba iqembu lethu silisungule kumnyaka ophelileyo sikhiphe idlalade elilodwa ngo2015 elithi Sesikhululekile.

Okwakhathesi sisapheka elinye esikhangelele ukulikhipha kuyonale inyanga ezayo.

CL: Abantu bathini ngomculo wenu njengoba selike lakhipha idlalade njalo likhangelele ukwenzelani uzulu lonyaka jahelibanzi?

CM: Abantu bayawujabulela kakhulu umculo wethu okusuka kusijabule lathi.

Ngalokhu thina sikhangelele ukujabulisa uzulu ngamandla ngokuhamba sisenza ama-shows endaweni ezitshiyeneyo ukuze abantu babesazi njengoba singakapheki iDVD.

CL: Akutsho ukuthi kungani mfokaMaphosa lakhetha ukuculela kweleSouth Africa lidela kwelakini?

CM: Okwenza siculele kweleSouth Africa yikuthi iqembu leli salisungula sikweleSouth Africa njalo kulula ukuthi sikhiphe amadlalade ethu nxa singapha.

Noma kunjalo khathesi sikhangelele ukuthi siyeculela kwelakithi koMthwakazi sibenzele ama-shows endaweni ezehlukeneyo.

CL: Njengeqembu elisacathula, bunzima bani eliyake lihlangane labo lokhe laqala ukucula?

CM: Ubunzima esiyake sihlangane labo njengabaculi yikuswela imali yokuzithuthukisa ikakhulu eyokukhipha iDVD njengoba lifuna imali enengi.

Okunye njalo sikhathazwa yikuthi abantu bayasintshontshela umculo wethu bawuthengise ngentengo ephansi.

Lokhu kusuka kwenze kube nzima ukuthi sithole imali emculweni wethu ngoba abantu noma besamukele ngendlela ephezulu kodwa basuka bathenge umculo kulabo abayabe bewuntshontshile ngoba uyabe utshiphe kakhulu.

CL: Kulobubunzima eselihlangane labo nkuthazo bani oyipha abaculi abasacathula?

CM: Kubaculi abasacathula ngithi kababambelele kwezomculo bengadeli noma behlangana lobunzima obunjani.

Okunye njalo ngithi kabasebenzise iziphiwo zabo bengahlabeli ngoba bedinga udumo kuphela ngoba ngeke baphumelele benganza njalo.