admin
Cornelius Luphahla
IQEMBU lomculo wesiNtu iKhaya Arts selikwenzile njalo nanko phela limema uzulu kanye labaculi abehlukeneyo kumkhosi wokujabulela iminyaka emihlanu labunjwa ehoteleni yeRainbow koBulawayo.
Umkhosi lo uzakuba khona mhlaka 3 Mpandula njalo iqembu leli lizavuthisa inkundla ndawonye lamanye amaqembu ezomculo atshiyeneyo.
UMthunywa ukhulumisane loFuture Dube uMqondisi waleliqembu wachaza ukuthi umkhosi lo uzaqala ngehola lesihlanu ntambama kusiya kuhola letshumi ebusuku.
“Umkhosi lo ngowokuthakazelela ukuthi iqembu lethu selileminyaka emihlanu lasungulwa njalo sonke esikuleliqembu lokhe sisaphila. Lokhu kuyasithokozisa kakhulu,” kutsho uDube.
Uqhubekele phambili eveza ukuthi banxuse abaculi abagoqela Abafana bakoDiki, uProsper Tshuma, i-Ezimnyama Arts, Clarence Guvura, iSnippers kanye lamanye amaqembu atshiyeneyo.
“Uzulu angathandabuzi ukuza kumkhosi wethu lo ngoba ukudla kwamehlo kuyabe kuyikho kodwa njalo ukutshelwa yikuncitshwa,” kutsho uDube.
UThabani Diki omunye wabacaculi bakamaskandi abazabe bekhona kulo umkhosi ubikele intatheli ukuthi emkhosini lo yikho azaphakululela abalandeli bakhe idlalade elitsha.
“Emkhosini lo ngizatshayela uzulu ingoma zami zonke kanye ledlalade lami elitsha engilikhiphe lonyaka.
Ngikhuthaza abantu ukuthi bengawukhuthi umkhosi lo ngoba yikho engizabavezela khona ukuthi lakuleli bakhona abaculi abalesiphiwo sokucula umculo kamaskandi,” kutsho uThabani Diki.
UProsper Tshuma umculi weAfro Contemporary Ndebele uchaze ukuthi uzaphakululela uzulu ezimnandi kuphela.
“Mina ngizaphakululela uzulu ingoma ezimnandi zodwa, ngeke ngibalise ukuthi yiziphi kodwa abazabuya bazazizwela.
“Ngalelilanga ngifuna abangawaziyo umculo wami batshele abanye ukuthi bazweni njalo baboneni,” kuphetha uTshuma.
Online Reporter