admin
KWEHLE ifu elimnyama esabelweni seNkabazwe kulandela ukukhothama kwenduna uBankwe.
Induna uBankwe, obizo lakhe lokuzalwa nguJeremiah Sibanda, ikhothame ngoLwesithathu kuviki ephelileyo eMberengwa isileminyaka yokuzalwa engu -94 utshiye amakhosikazi amane labantwana abangu-30.
Induna uBankwe ifihlwe ngoMgqibelo khonale eMberengwa.
Esinye isakhamuzi esingaphansi kwenduna le, esigabeni seDolo uMnumzana Joram Moyo uveze ukuba balehlekelwe.
“Simadolo nzima ngokuhanjelwa yinduna yethu ebikade isebenza nzima njalo ibisibambanisa njengabantu bayo. Ibisazisa abantu kakhulu njalo ihlonipha lomphakathi.
“Ayisiyomuli yakoBankwe yodwa elahlekelweyo lathi njengezakhamizi sikhala kanye lemuli yakhe sithi kalale ngokuthula ngempela isidilikile intaba enkulu,” kubika uMnu Moyo.
Ekhuluma lentatheli omunye wezinduna zesabelweni seNkabazwe induna uNgungumbane uchaze ukuba balahlekelwe.
“Isabelo sakithi silahlekelwe kakhulu ngumuntu obehlakaniphile njalo elolwazi. Ubengumuntu ongazondiyo.
“Wagcotshwa ukuba yinduna ngomnyaka ka2018 njalo ngesikhathi esaphila usebenze kuhle kakhulu lozulu wonke nje jikelele,” kuphetha induna uNgungumbane.
Online Reporter