admin
KUKALUTSHWANE ukuthi amaqembu angatshabalala amalunga akhona abuye ahlangane abumbe elinye iqembu, elithi lingaze lihlangane lezivunguvungu zonke kodwa lisale lilokhe limile lingajiki. Elinye iqembu eselihlangane lalokhu ngeleGreat Stars. Iqembu leli selike ladlala kamnandi endaweni eziphakemeyo. Landela ingxoxo elandelayo phakathi kukaSamkelo Tshuma (ST) lomgcinisihlalo waleliqembu uNhlalo Mangena (NM).
ST: Sichazele ungubani ovela ngaphi?
NM: Ibizo lami nginguNhlalo Mangena, ngakhulela koBulawayo kodwa ekhaya ngivela eNkayi koMasukume.
ST: Sichazele ngamafitshane imbali yaleliqembu.
NM: Iqembu lethu lisungulwe ngoMpalakazi 2014, ngemva kokuba sisuke kwelinye iqembu elibizwa ngokuthi yiNsika yesizwe. Amalunga asungula leliqembu yimi loPhilani Donga, Timon Njiba kunye loMthokozisi Moyo.
ST: Kungani wakhetha ukuhlabela, khona kulezinye izinto owawungazenza ngemva kokusuka kuqembu leNsika yesizwe?
NM: Ukuhlabela ngiyakuthanda njalo ngavela ngakhula lakho ngoba bathi ikhula lamanono ayo. Yikho nje ngingazange ngidele ukuhlabela lanxa ngake ngahlangana lamaqembu angaqakathekisi umculo. Lokhu yikho kanye okwangenza ngaqhubeka lamanye amalunga eNsika yesizwe.
ST: Ngaphandle kokuhlabela ukhona omunye umsebenzi owenzayo?
NM: Ngingumthengisi (sales representative) e-Battery World koBulawayo.
ST: Kungani lakhetha ukusebenzisa ibizo elithi Great Stars?
NM: Lakhethwa yimi ngoba inhloso yethu yikuthi silethe ukukhanya empilweni zabantu.
ST: Phezulu ukhulume ngokuthi usuka eNkayi, wonke amalunga eGreat Stars asuka khona na?
NM: Amanye amalunga asuka eZhombe yimi ngedwa oweNkayi kodwa sisesiqintini esisodwa.
ST: Selike lamenywa ukuthi lidlale emicimbini emikhulu na?
NM: Siyake sinxuswe ukuthi sidlale emicimbini emikhulu, kule ndawo ezifana laboSouthern Comfort, Big Cave Safaris kunye le Parrot lodge lazo ezihlala zisinxusa ukuthi sidlale khona.
ST: Kumincintiswano yokuhlabela selike lathola isicoco?
NM: Yebo sangena kumncintiswano weIngwebu ngo2013 sathola isicoco.
ST: Ingoma zenu zimayelana ngani?
NM: Ezinye ingoma zethu ziyafundisa amasiko ethu njengabantu besintwini ngoba sinanzelela ukuthi amasiko akithi kasananzwa endaweni ezinengi ngakho sifisa ukuwavuselela ngokuhlabelela. Idlalade lethu elithi uMaDewa likhuluma ngakho. Kwezinye indawo abantu lokhe besananza amasiko ngakho sifisa ukuthi lathi esiNdebeleni abantu benze okufanayo.
ST: Lizibona lingaphi kuminyaka emihlanu ezayo?
NM: Ngaleso sikhathi sifisa ukuba sibe sesifundise enye intsha ngokucula, banengi abantu abatsha abangasebenziyo ngakho sifisa ukubasiza bangene ekuculeni ukuze benze okungcono ngempilo zabo kulokuthi babeyizephulamthetho.
ST: Nhlupho bani elihlangana lazo njengeqembu?
NM: Kwezinye izikhathi sasiswele imali yokuthi sicindezele ingoma zethu, ukuze labakhatshana bathole ithuba lokuzilalela.
ST: Nkuthazo bani ongayinika amaqembu aqalayo?
NM: Amaqembu aqalayo kabambelele, nxa kuyikuthi baqale bebodwa bengela muntu omdala ongabatshengisa indlela kabamdinge njalo abengumuntu olothando lokucula, ngaleyo ndlela ngeke balahleke.
Online Reporter