Online Reporter
Nkosilathi Sibanda
IQEMBU leGwanda Pirates libika ukuba selilungele ukwethula abadlali abatsha njengoba liqalisa amalungiselelo omkhankaso kuZifa Central Region Soccer League.
Iqembu leli lehluleke kancane ukuthola ukukhuphukela phezulu kuligi yePremiership, laqeda isizini likunombolo yesithathu lilandela iSheasham lentshantshu iHardrock.
Ngaphansi kobukhokheli bukamqeqetshi uJohannes “Tshisa” Ngodzo, iGwanda Pirates yaveza umdlalo omuhle kakhulu ngesizini yalo yakuqala kuDivision One.
Unobhala jikelele weqembu, uDumolwenkosi Dube, uthe iqembu lizakwethula abadlali abatsha kumalanga alandelayo.
“Umqeqetshi wethu ufuna ukugcina inengi labadlali abakade bekhona ngesizini edluleyo kulungiselelwa umkhankaso ka-2026,” kutsho uDube.
“Sikhangelele ukuthi sibe lesivumelwano labadlali abatsha abahlanu abazakwethulwa kumalanga alandelayo. Bakhona njalo abanye abavela phandle kweZimbabwe esizabakhangela.
Uthe babonga kakhulu usekelo abaluthola kubalandeli beqembu.
“Isisekelo sombuso eqenjini yikuthi abalandeli balomlandu wokuncedisa. Kulengatsha zabalandeli ezilenkokheli okuyilapho esithola khona usekelo. Siyakubongela lokhu.
“Emhlanganweni weAGM, abakhokheli babalandeli bathembisa ukuqoqa imali yokusekela iqembu, njengoba singela mxhasi. Kasisoze senqabele leyo mizamo ngoba iyasiza kakhulu.
Imali le izanceda ekuqiniseni iqembu ngokusayinisa abadlali abatsha abakhethwa ngumqeqetshi,” kutsho uDube.
