admin
NguNkosilathi Sibanda
IQEMBU leHighlanders lifuna ukubukelwa kakhulu kumabonakude weSupersport kulisizini ngoba kulapho elithola khona imali enengi.
Ngokudingisisa kwephephandaba likazulu, inkampani yeSupersport yanikeza ithimu yezwe lonke i$20Â 464 ngesizini ka-2014. Ngomnyaka ka-2013 iBosso yathola i$18 800.
Kuyo yonke imidlalo yeligi yeCastle, iHighlanders yenelisa ukuthola imali ephezulu kwe$20 000 ngesikhathi ihlaselwe yiDynamos eBarbourfields. Kulumdlalo ababukeli bomdlalo bakhipha i$23 802.
Uluhlu lwemali ezangena esikhwameni seqembu luveza ukuthi ngaphandle komdlalo weDynamos, iBosso yaholiswa imali enengi ngumabonakude weSupersport.
Enye ithimu okukhanya inceda iBosso ukuthi yehlise izikwelede zayo yiCaps United yona eyaletha i$14 310 emagumeni, kulandela iFC Platinum leHwange.
Imali etholwa kumidlalo yobungane leyenkezo iyabelwana phakathi kwamathimu adlalayo.
Kuyaziwa umhlaba wonke ukuthi kumdlalo wenguqu amathimu abulawa yimali ngokuphuma kuTV. Kuligi yeBarclays eNgilandi amathimu akhitshwa phose iviki zonke njalo athola imali efika imiliyoni.
Umbiko lo uza ngesikhathi abalandeli beHighlanders becela inhlanganiso yePSL ukuthi ibone ukuba umabonakude weSupersport uyakhipha ithimu le kanenginengi ukuze kungene imali.
Umaqhuzu wePSL uKennedy Ndebele utshele uMthunywa ngoLwesibili ukuthi bazakhulumisana lenkokheli zeSupersport, kudingwa amaqhinga wokuthi wonke amathimu athole amathuba alingeneyo kumabonakude.
“Leyo yindaba ehlanganisa wonke amathimu ethu kuligi yeCastle. Sizakhulumisana ukwenzela ukuthi siphume lenyathelo elingcono.â€
Ngomnyaka odluleyo kwaqhamuka ukukhonona kumathimu akumhlubulo ongezansi yelizwe mayelana lokungakhitshwa kwemidlalo yeCastle PSL kumabonakude.
Umaqhuzu wePSL lo waphuma kumaphephandaba esithi iSupersport ayisenelisi ukusuka edolobheni leHarare kumidlalo eseleyo kulisizini.
Kulamathimu akhala ngokuthi awanikezwa ithuba elifana lamanye aseHarare ekukhitshweni kumabonakude kaSupersport.
Uhlelo lokukhethwa kwemidlalo ebikhitshwa alwaziwa.
Ukuphuma kwemidlalo kumabonakude kuletha imali kumathimu kanye lakuPSL ngoba amabhizimusi ayabhadala ukuthengisa impahla yazo ngesikhathi leso.
Kusenjalo, ababukeli bomdlalo bazaphiwa ithuba lokubona imidlalo yenkezo yeChibuku esifike ihlandla lama-semi-final kulimpelaviki.
IHighlanders, ithimu ehlalele evalweni, ingena umango isiyahlangana leHarare City ngeSonto.
IBosso isithembele kulumncintiswano ukuthi izame ukuthabisa abasekeli bayo. Inkezo yeChibuku leyeMbada yizo zodwa esezikhangelelwe yithimu yezwe lonke njengoba eyeCastle isiphunyukile.
Online Reporter