Kwakhiwa inkundla yenguqu eNkayi

YiNtatheli kaMthunywa
UMAQHUZU weNkayi Rural District Council (RDC), u-Zimbabwe Ndlovu, usebike ukuthi ikhansili le isilomqondo wokwakha inkundla yomdlalo webhola likanobhutshuzwayo, ezaphakamisa isigaba leso.
Lokhu kuza ngemva kokungena kweqembu leNkayi FC, ebelidlala emahlangeni, kuDivision 1.

“Sokudingakala inkundla yokudlalela ibhola lapha eNkayi. Abafana bethu bayasikhuthaza kakhulu njalo sesihlale phansi njengenkokheli zalapha eNkayi ukuze sibakhele inkundla ebiza bona ukuze bangacini besiyadlala kwezinye indawo ezifana laboHwange kanye lakoBulawayo ngenxa yokuswelakala kwenkundla,” kutsho uNdlovu.

Iqembu leNkayi FC okuliqembu elakhiwe yizakhamizi zakuleyondawo belihlala likhala ezimathonsi ngenxa yokuswelakala kosekelo lwemali.

Kubikwa ngenxa yodubo lolu abaqeqetshi bebekhipha ezabo imali ezambeni zabo ukuze kuqhutshwe inhlelo zalo, selize laphumelela langena kuDivision 1.

“Kuyasithokozisa kakhulu ukuphumelela kweNkayi FC. Vele kumele sibelenkundla lapha eNkayi. Ukubakhona kwenkundla kuzabe sokusitsho ukuthi izikolo eziseduze lazo zizathola usizo kungakhiwa inkundla lapha. Sifuna amaqembu azavela khatshana, lawo aze lapha eNkayi ukuzodlala lathi,” kuqhuba uNdlovu.

Ubike ukuthi uyawuthakazelela umqondo wokuthi kube lenkundla eTsholotsho njalo lokho kuzathuthukisa izigaba zakuleyo ndawo nanko phela inkundla isiza lokunengi okubalisela ukuphathwa kwemikhosi eqakathekileyo.