Online Reporter
Nkosilathi Sibanda
LONYAKA abathandi bezomculo, imigido lemidlalo yokulingisa bazakholisa ngokunengi okuzaphakululwa yiKhaya Arts.
Iqembu leli, elidabuka koBulawayo lazakhela udumo laze lathola izicoco zaphezulu kuleli, ezigoqela lese-National Arts Merit Award (Nama) nyakenye lakuminyaka edluleyo. Umqondisi walo, uFuture Dube, ngomunye owathola inhlonipho ngezicoco zeNama, ngomsebenzi wakhe eqenjini.
Njengesitshengiselo sokuthi ihlose ukusebenza gadalala ikholisisa uzulu, ngeviki edluleyo iKhaya Arts, ibambane lequla leBulawayo Theatre Club, isethula umdlalo othi: Ipi Ntombi kuqhutshwa umkhosi weBulawayo Arts Festival.
Ekhuluma ngalumdlalo, uDube uthe ungomunye abawuqoqe leBulawayo Theatre Club ngobunono obuphezulu njalo bakhangelele ukuthi baqhubekele phambili ngawo.
“Umdlalo lo, Ipi Ntombi” ngumdlalo owenziwa kudala kweleSouth Africa ngakho lonyaka iBulawayo Theatre yacabanga ukuwuphendukisa ngonyawo olutsha lwakoBulawayo, basebecabanga ukuxhumana lathi ukuze sincedisane ukuthi uphume kuhle njengoba iKhaya Arts isenza izimanga kwezokunandisa,” nguDube lo ekhuluma lephephandaba likazulu.
Umdlalo waqondiswa nguSandy Bradnick, esebenza loVusi Ndebele owaqondisa uhlelo lwengoma ezitshaywa kulumdlalo. UDube wasebenza engumqondisi wokugida.
Ebika ngabakuphakulule lonyaka, uDube uthe: “Lonyaka sikhangelele ukuhlanganyela lelinye iqembu leBotswana, silethe umdlalo omkhulu ohlanganisa amazwe womabili.”
