Online Reporter
Nkosilathi Sibanda
AMAHLOMBE kaJoel “Dubai” Luphahla kumele ukuthi ayamsinda. Ulomthwalo onzima ukuthi awethule nanko kulimpelaviki uzadibana leqembu akhulela kulo, kuhloswe ukuthi alinqobe nxa efuna ukuthenjwa ngokuqinileyo ngabaqhatshi bakhe.
ULuphahla uzakhokhela abafana bakhe beSimba Bhora belande ukuzodlala leHighlanders kumdlalo weCastle Lager Premiership eBarbourfields ngeSonto emini.
Lo ngumdlalo obalelwa kweminye emikhulu kulimpelaviki lapho iligi yeCastle Lager ezabe ingena kuviki letshumi lanhlanu.
Ngokuma kwengalane yeligile le, iSimba Bhora idlala kuhle ukwedlula iHighlanders. Abafana bakaDubai bakunombolo yesibili belemiklomelo engu-26, behlukene ngemine kuphela kuMWOS esesiqongweni.
Abadlali bakaKelvin Kaindu kuHighlanders bakunombolo yesitshiya galolunye belemiklomelo engu-19.
Lokhu kubeka iSimba Bhora phambili njalo labacubunguli bomdlalo bacabangela ukuthi uLuphahla uzamkhulela uKaindu ngeSonto. Kulisizini, iSimba Bhora isinqobe kumidlalo eyisikhombisa, yanqotshwa kabili, yabangutshiki lobhanqa lamaqembu amahlanu. IHighlanders isinqobe imidlalo emine, yamelana lamaqembu ayisikhombisa, yanqotshwa kathathu.
Kumdlalo wazo weligi, owokucina ngesizini edluleyo, iGo Bhuju Go yanqoba iBosso 2-1 enkundleni yeWadzanayi, eShamva. Kwaqala ngokuhlohla iHighlanders ngebhola elagaxwa entanjeni nguMarvelous Chigumira ngomzuzu wesi-21, iSimba Bhora yaphendula ngoTymon Machope esigabeni sesibili ngomzuzu wesi-48. Elesibili lahlohlwa nguWalter Musona ngomzuzu wesi-58.
Amaqembu la aphinda adibana kunkezo yeChibuku lapho umdlalo ongazange usaphela ngoba iHighlanders iyale ukuthi umbekwa owaphiwa iSimba Bhora usemthethweni.
NgeSonto kuzakuba ngumdlalo ogcwele umfutho lokuphindisela kumaqembu womabili. Kuzakuba ngumdlalo njalo lapho uLuphahla azafuna ukuthi atshengise abaphathi beHighlanders ukuba “balahlekelwa” lithalenta lakhe lokuqeqetsha, nanko phela lumqeqetshi wasuka engajabuli kuleliqembu mhlaka 23 Zibandlela 2024.
Ngaleso sikhathi, uLuphahla wehliswa esikhundleni sokuba ngumsekeli kamqeqetshi, ephiwa isikhundla sokukhuza iqembu leBosso 90, elidlala kuligi yeZifa Southern Region Division One.
Abalandeli bamaqembu womabili bayakuvuma ukuthi lo ngumdlalo kuzwa. Njengenjwayelo, abeBosso bathembise ukuthi bazangena ngobunengi, bagcwalise inkundla kwethuke izethekeli.
“Okwenzakala ngomnyaka odluleyo asikubali. Laba (Simba Bhora) sizabadla kuphela eBarbourfields. Esizaqina ngakho yikuthi sibethusele ngokuhlabela kuze kuyevalwa,” kutsho umlandeli weHighlanders owaziwayo uChanke Dube.
LoMehluli Maphosa, osekela iHighlanders uthe iSimba Bhora bazayichumisa.
“Siyakubona ukuthi badlala kuhle kulisizini, thina lathi sikhonapho loba nje besitshiye ngesikhala esikhulu kulogu. Ukubanqoba eBarbourfields kubaluleke kakhulu ngoba sizabe sifundise umqeqetshi labadlali bakhe ukuthi iBosso yithimu engadelelekiyo,” nguMaphosa lo.
Kusenjalo, elinye iqembu lakoBulawayo, iChicken Inn lingena umango liqonde kuCaps United, okungomunye umdlalo odonsa amehlo. Ziyasadalala zombili emkhankasweni zihlezi ngokulandelana kungalane yamaqembu, iChicken Inn (13) ilemiklomelo engu-13, CAPS United (14) ilemiklomelo engu-13.
Imidlalo yeCastle Lager Premiership
ngokugcweleyo:
NgoMgqibelo
Greenfuel v TelOne (Greenfuel Arena), CAPS United v Chicken Inn (Rufaro), Ngezi Platinum v Manica Diamonds (Baobab), Bikita Minerals v Dynamos (Gibbo|), Yadah v Herentals (Heart), FC Platinum v ZPC Kariba (Mandava)
NgeSonto
Highlanders v Simba Bhora (Barbourfields), Triangle v MWOS (Gibbo), Scottland v Kwekwe United (Rufaro)
