admin
YiNtatheli kaMthunywa
IDOLOBHO leHwange liyatshisa njalo leqembu lakulindawo iHwange FC liyatshisa kulenzinsuku.
Iqembu leli belisemilonyeni yabanengi ngokwehluleka kwalo ukubhadala iholo lendleko zabadlali kodwa liphenduke kuliviki ngokuhlohla amabhola amanengi ukwedlula wonke.
IChipangano inqobe 5-3 idlala leTriangle enkundleni yeColliery, okubengumdlalo odonse idlabuzane lababukeli abakade bacina ukubona iqembu leli lihlohla.
Kulandela ukumiswa umsebenzi kukamqeqetshi omkhulu uNation Dube, iHwange ibeyithimu edliwa mahlayana nje, okusuke kwaba lensolo ngobungcitshi bukaMebelo Njenkwa osabambe umsebenzi.
Ngemva kokubhoboza umambule kahlanu, wonke umuntu ongaphansi kwaleliqembu usezitshaya isifuba.
Ekhuluma loMthunywa ngoLwesithathu, umqeqetshi uMebelo Njenkwa usuke waziphosela amehlo wathi amanye amathimu ananzelele ngoba iHwange ayithambanga khathesi.
IHwange izadibana leChicken Inn ngoLwesithathu kuviki ezayo enkundleni yeLuveve. UNjenkwa uthe iHwange FC izaqhubeka ihuba okuzenza ibalekele ukuhlala emsileni wengalane yelogu yeCastle Lager.
“Umdlalo odluleyo besiwulungiselele njalo besizizwa ukuthi sizanqoba. Bengisazi ukuthi ikhona ithimu esizayichumisa egumeni lethu. Siyitholile iTriangle.
“Nxa singaqhubeka sidlala kanje kutsho ukuthi iHwange izaphetha ikunombolo engcono kulaleyo esikuyo khathesi,” kubika lumqeqetshi.
Okwamanje iChipangano ilemiklomelo engu-27, ihlezi kunombolo yetshumi lantathu kungalane yamaqembu.
Iqembu leli selihlohle amabhola angu-18, ledlula amanye afana leDynamos.
“Bekunzima kumidlalo edluleyo kodwa sekukhanya kulula khathesi. Abagadli bethu lapha kuHwange bengaqinela ukuhlohla kuyo yonke imidlalo, singaqeda isizini sikhuluma ngokunye,” kuchaza uNjenkwa.
UNjenkwa ukhuza iqembu elisanda kubika ukuthi liyehluleka ukubhadala abadlali njalo ukuswelakala kwemali kulithimu yikho osekubangele ukuthi lidlale ngokwehluleka.
Ekuqaleni komnyaka kubengumthwalo ukuthi iHwange FC ithenge abadlali. Iqembu leli kungaba yilo lodwa elingazange lihuge abadlali ngemali kumaqembu wonke asezansi yelizwe.
Kwakusaziwa ukuthi iChipangano ithenge abadlali abavela kwezinye indawo. Isinqumo esesithethwe yizikhulu zaleliqembu ngenxa yokuswela imali yikuthi iChipangano idlalelwe ngabafana abaphuma eHwange kuphela.
Kodwa, ngokuhlolisisa umdlalo walithimu kumasizini ambalwa adluleyo, kutholakale ukuthi iHwange ibiqalisa kuhle, yehluleke isizini isiyaphutsha.
Mhlawumbe ingakutshintsha lokhu, iqhubeka ihlohla amanengi njengalokho ekwenze kuTriangle.
Online Reporter