admin
Intatheli KaMthunywa
UMGADLI omutsha weqembu leKaizer Chiefs uEdmore “Spanela” Chirambadare usebike ukuba wamukelwe kuhle enkambeni yeNaturena lapho asebona kulikhaya lakhe njalo kulapho azalola ubungcitshi bakhe bokuhlohla amabhola.
UChirambadare ubeyingxenye ye-Amakhosi ekuqaleni kwalumnyaka ngemva kokukhanga amehlo abacuphi balithimu ngesikhathi esadlala kubanqobi beligi yeCastle Lager kuleli iChicken Inn.
“Ngifike kuhle lapha eSouth Africa. Okungithabisileyo yikuthi iKaizer Chiefs ingenze ngaba ngumdlali owamukelekileyo eqenjini. Ngizizwa ngisekhaya,” kutsho lumdlali ekhuluma loMthunywa eseGoli.
Loba engadlali imidlalo eminengi, uChirambadare ubike ukuba kusesemasinyane ukuthi ubungcitshi bubonakale njengoba isizini isaqalisa.
“Ngiyazi ukuthi umqeqetshi wethu uSteve Komphela ungayizwisisa njalo uyazi isizatho sokungigcina ebhentshini.
Isizini khona ivulwa ngakho ngizathola ithuba lokuzitshengisela ngesikhathi esifaneleyo.
“Okumele ngikwenze yikutshengisa umqeqetshi wami ukuthi ngiyinsika yokuphumelela kwethimu le,” kuveza uChirambadare.
Ngokuthengwa kwakhe yiKaizer Chiefs, abanye kumaqula abalandeli benguqu kuleli baphanga basola bathi umdlali lo angeke wenelisa ukuthi alidlale kuqembu leNaturena.
Okwengeza ukuzethemba kulumdlalo yikuthi ababukeli labathandi benguqu yaseSouth Africa bamnikeza usekelo.
Abalandeli laba babika ukuthi okuzenza uChirambadare abengumdlali ozaduma eGoli yikubambana kwakhe loMitchel Katswairo, laye ovele kuChicken Inn esiya kuKaizer Chiefs.
“Umdlali lo nguye esasimfuna. IKaizer Chiefs kumele iphenduke ithole icebo lokunqoba inkezo, layo yonke imincintiswano isebenzisa abafana laba. UChirambadare uyazi ukureyitsha ayephutsha lalo ibhola.
“Uyahlohla njalo nguye ozalandela ezinyaweni zikaKhama Billiat loWillard Katsande. Nxa engahlangana lomunye wakhe uMitchel Katswairo, kuzasukuma inkundla ezinengi kuligi yeAbsa eSouth Africa,” kubika umaneja weKaizer Chiefs uBobby Motaung.
UChirambadare uthe njengoba esebalelwa ezinyaweni zikaBilliat loKatsande, inhloso yakhe yikuthi ahlohle amabhola amanengi engaphiwa ithuba.
“Kumele ngihlohle amabhola amanengi kulabo bonke emnyakeni wami wakuqala ngilapha.”
UChirambadare uthe uhambo lwakhe lokuyadlala ezizweni belungeke lwaphumelela kungela nkuthazo kaLizwe Sweswe umqeqetshi weTsholotsho FC okunguye owamvula amehlo kumdlalo wenguqu.
Online Reporter