adminNXA umuntu esethandweni uyambona ukuthi impilo yakhe iphelele sibili ngoba phela uthando luyinsika yempilo yomuntu.
Kuyafana lomntwana nxa ekhuliswa ngothando ngabazali bakhe kumbe labo ahlala labo, uyabe ekhanya ukuthi uchelesile empilweni.
Kuyadanisa ke ukuthi ngalezi nsuku kukhanya uthando alusekho ebantwini, sebavuka ubhova nanku imihla lamalanga sihlala sisizwa ukuthi abantwana babhinyiwe, umntwana ubulele unina kumbe indoda ibulele umkayo.
Lokhu ukuthi abantu bayathandana kube kuhle kubenjeya kukhanya hatshi akusekho emoyeni yabantu. Sokuhlala kulwiwa ezindlini abantu betubhulelane imilomo sangathi vele abazange bake batshelane amagama amnandi ebutsheni bothando lwabo
Kudala sasisizwa ngabantu abahlala bonke okweminyaka efika 50 njalonjalo kodwa khathesi ngeke uzwe lokhu.
Uzwa kuthiwa uNgwenya lomkakhe sebehlukana kumbe uSekaPhilani kasahlali emzini wakhe usehlala ledlalicatsha.
Njengawo la amadlecatsha sikhathele ngawo. Asechithe imizi eminengi njalo lokhu kiwo akuthi thika ngitsho. Laba bafazi balomona owesabekayo njalo abesabi ukwehlukanisa indoda lemuli yayo. Lawo amadoda awasayiwa ngabo omakhwapheni laba. Ukuchitheka kwemitshado kukhanya sokuyifashini. Uyezwa kuthiwa uzibani lobani batshadile, dukuduku uzwe sekuthiwa umtshado usudatshulwe.
Hawu bantu bakithi kanti kutheni? Kungaba yinto enhle ke ukuthi abantu balandele impilo yabokhokho ngoba kukhanya yiyo elekusasa enhle. Kusizani ukuba ngumehlomehlo umuntu ezakufa lelanga lingakatshoni. Kunjenje abantu sithi amasiko kawasizi empilweni sikhohlwe ukuthi ogogo labokhokho baphila nje ngenxa yokulandela wona amasiko wonala esesisithi kasiwafuni ayasiyangisa.
Asilandeleni amasiko bantu bakithi akwaziwa mhlawumbe indubo lezi esibhekane lazo zingasixeka lemikhuhlane le engelapheliyo mhlawumbe layo ingaze ithole.
Asifundeni ke isifundo ebantwini abalandela amasiko abaphila impilo yabo ende egcwele injabulo kuphela.
Asiwalandeleni amasiko bantu baka mthwakazi akwaziwa mhlawumbe lempilo zethu zingaguquka zibe zinhle.
Online Reporter