adminYiNthatheli KaMthunywa
KULEJAHA elidabuka esigabeni seLupanda eLupane elitshiye inkundla yeHwange ikhakhamele ngemva kokuveza ukuthi lidlwengule omunye umfana ngoba lifuqwa yimimoya yabaphansi.
Umsolwa u-Amkela Ncube oleminyaka engu-21 yokuzalwa wenze ihlazo leli phakathi komnyaka ophelileyo ngesikhathi elomamangala oleminyaka yokuzalwa engu-17.
Kubikwa ababili laba babesemzini kaMnumzana Geofrey Chimhanda lapho abaqhatshwe khona ukwelusa izifuyo.
Kubikwa ngehola lakuqala ekuseni ngalelolanga umsolwa waqala ukuphulula umamangala qede wamkhulula izigqoko zangaphansi.
Kubikwa ngemva kwalokho wakhupha ingqamu yohlobo lwe-okapi wethusela ngayo umamangala andubana ambambe ngamandla amhlukuluze emacansini. Kuzwakale ukuthi ngelanga elilandelayo umsolwa wavuka ebutha okungokwakhe watshaya utshani engazange atshele muntu lapho ayelubhekise khona.
Umamangala kubikwa wabika udaba emapholiseni. Kuthe ngeviki edluleyo umsolwa wabonakala emzini lo okwabangela ukuba abotshwe.
Umsolwa ubemiswe emthethwandaba weHwange ngoLwesihlanu lweviki ephelileyo esetheswa icala lokulala lomunye owesilisa.
Ebuzwa ngumantshi uDambudzo Malunga ngecala leli, umsolwa ulivumile icala lakhe njalo uveze ukuthi walala lomamangala ngoba efuqwe yimimoya yamadlozi akubo.
Umantshi umgwebe ukuyaphika entolongweni okweminyaka emihlanu ngaphambi kokumephulela iminyaka emibili.
Umtshutshisi bekunguMnumzana Tawanda Sigauke.
Online Reporter