Online Reporter
Nkosilathi Sibanda
USOMABHIZIMUSI wodumo kuleli uWicknell Chivayo, usechazwe njengendoda elobuntu, etshisekela ukuphakamisa umphakathi lakho konke okuhlanganisa abantu bakuleli.
Lokhu kukhulunywe ngumgcinisihlalo wenhlanganiso yeJohn Landa Nkomo Trust, uJabulani Nkomo, kulandela ukwethulwa kwesipho semali kuqembu lenguqu iHighlanders, sivela kuChivayo ngeviki edluleyo.
UChivayo uthembise ukusekela iBosso nge-US$1 million njalo uhle wahambisa phambili iUS$250 000 kuleliqembu njengesitshengiselo sokuthi uzimisele ekuphathiseni iqembu.
Kuncwadi elotshwe nguNkomo kuliviki, abeJohn Landa Nkomo Trust bethule isibongo esikhulu kuChivayo.
“IJohn Landa Trust ithanda ukubonga uSir Wicknell Chivayo ngomusa wakhe kuHighlanders FC, njengokubonakale ekuzimiseleni kwakhe ekupheni iqembu iUS$1 million, lokukhipha iUS$250 000 phambilini.
Phezulu kwalokhu, sibonga ukuthi uChivayo ubabaze ukuthi wakhuthazwa yisimilo sikamuyi owayenguMsekeli kaMongameli welizwe, uJohn Landa Nkomo.
“Inyathelo likaChivayo, ikakhulu lelo elokuphathisa iHighlanders, litshengisa ukuzimisela kwakhe ukugcwalisa izifiso zikamuyi, u-Vice President, esikholelwa ukuba zithinta inengi labasakhulayo kuleli,” kutsho uJabulani Nkomo.
Uqhubeke wathi: “Isenzo lesi sizaphathisa kakhulu njengoba iHighlanders izathakazelela iminyaka engu-100 ngomnyaka ozayo. Okwenziwe nguChivayo akube ngumzekeliso ozalandelwa ngabanengi.”
Ngeviki edluleyo uChivayo wakubeka emphakathini ukuthi uzaphathisa iBosso, egcizelela ukuthi wafuqwa yinkuthazo ayithola kumuyi uJohn Landa Nkomo.
Inkokheli zeHighlanders lazo zabeka ukubonga kwazo kusipho sikaChivayo. Kukhangelelwe ukuthi iBosso isebenzise imali le ukuthenga abadlali, ukubhadala izisebenzi lezinye inhlelo. Abalandeli baleliqembu loba bephikisana ngenyathelo likaChivayo, inengi liyakuncoma ukuthi ungomunye wabosomabhizimusi abalothando lokuphathisa lapho iqembu lisenkingeni.
Usomabhizimusi lo nguye owabhadala imali yomqeqetshi uBaltemar Brito lomsekeli wakhe u-Antonio Torres, iUS$27 000. Lokhu kwenqabela ukuthi iHighlanders iphiwaeizijeziso yinhlanganiso ephethe inguqu umhlaba wonke eyeFifa
