Online Reporter
Mthabisi Tshuma
IQEMBU leMvimbi Arts liyaqhubeka ngokufakaza ukuthi ukufunda lokubekezela kudala umehluko lempumelelo.
Ngenxa yokuzimisela emsebenzini wokuthokozisa uzulu kwezomgido lemidlalo, iqembu leli libe yintshantshu yeChibuku Neshamwari Traditional Dance Festival esabelweni seMatabeleland North, okutsho ukuba lizaqhubeka lisiyancintisa lezinye izabelo. Lokhu kuzabe kungokwesithathu Imvimbi Arts ifinyelela kumncintiswano wezabelo.
Iqembu leli lasungulwa ngomnyaka ka2001.
Ngomnyaka ka2012 iqembu laqala ukuncintisa kuChibuku Neshamwari lisase koBulawayo laqeda likunombolo yesithathu. Ngo2014, lancintisa njalo koBulawayo lathola inombolo yesibili. Laqhubeka lisehluleka ukuthi lifike kumncintiswano wezabelo, inkokheli zalo zakhetha ukuthi iqembu liyehlala eMatabeleland North.
Kulesi isabelo, laba yintshantshu ngo2019, 2023 lango-2025.
Omunye wabasunguli beMvimbi Arts uBlessed Chakomoka uthe bafisa ukuthi babe liqembu elizaphakamisa isabelo seMatabeleland North.
“Iqembu lasungulwa ngoNcwabakazi 2001 eNtumbane ngamalunga adabuka koBulawayo, Victoria Falls, Jambesi, Lupane laseNkayi. Inhloso yethu yikusabalalisa amasiko ethu emhlabeni wonke kwezomculo lemigido.
“Besitshengisa umgido odume eKwaZulu Natal eSouth Africa obizwa ngokuthi uMzansi. Sikhethe umgido lo ngoba uhambelana lendlela esigida ngayo njengeqembu eliledlabuzane kumigido yomdabu,” kutsho uChakomoka.
Uthe lonyaka bazasebenza nzima bedinga impumelelo.
“Ngijabule kakhulu njalo kube ngeminye yenhloso zethu ezinkulu lonyaka njengakuma-Victorian Awards lapho esathola isicoco se-Best Arts Group.
“Okuseleyo yikuthi silungiselele umncintiswano wezabelo. Sibonga usekelo esiluthola kuHulumende nanko mhlaka 2 Nhlangula saphiwa ithuba lokuhlabela lokugidela uMongameli uMnangagwa ezovula umhlangano weSADC Parliamentary Forum.”
