adminYiNtatheli kaMthunywa
KWENZAKALE insindabaphenduli yendaba emzini wakoMoyo esigabeni seSomgolo eLupane ngemva kokuba umninimuzi eqhatshe esinye isakhamuzi ukuba simakhele ikhabothi yemiganu yasiphenduka umgobho.
Isiga lesi senzakale emavikini amabili adluleyo ngaphansi kukasobhuku uJeremiah Moyo lapho uNkosikazi Melisa Moyo aqhatshe khona uNkosikazi Sakhile Ncube ukuba amakhele ikhabothi yadilika ebusuku yaphenduka umgobho obhebhayo qede yanyamalala.
UMthunywa ukhulumisane lesinye isakhamizi sakule indawo uNkosazana Melody Ncube ochaze ukuthi yena wayekhona mhla uMaNcube esakha ikhabothi le.
“Mina ngangikhona uMaNcube esakha ikhabothi koMoyo. Into eyangimangalisayo yikuthi kwathi ngelanga elilandelayo ngezwa sokuthiwa ikhabothi idilikile ebusuku abantwana belele. Kuthiwa omunye wabantwana laba waphupha ebona ithendele endlini lithandelwe yinyoka wasesethuka ephaphama.
“Kuthe kunjalo wasesokhela isibane wabona ikhabothi le sidilikile wavusa abanye bayatshela unina ngoba besesaba ukuthi mhlawumbe ingabadilikela njalo njengoba yayingakapheli. Ekuphendukeni kwabo lonina kuthiwa bathola inkalakatha yenyoka isizigoqile ibhebha yasinyamalala bekhangele,” kutsho uNkszn Ncube.
Kuzwakale njalo ukuthi indaba yenyoka le kwakufanele iyebikelwa usobhuku ukuze ithoniswe kwehlula ngokuthi icala lalisidla uNkkz Moyo okwadala ukuthi akhulumisane kuhle loMaNcube wasemxolisa wangasayimangala kusobhuku.
Ekhuluma loMthunywa uNkkz Mervis Moyo onguye odilikelwe yikhabothi le uchaze ukuthi kuliqiniso ukuthi ikhabothi yakhe idilikile.
“Kuliqiniso sibili ukuthi ikhabothi yami idilikile kodwa okwenyoka lokho angikwazi. Inyoka ingaze ibonakale kuyatholakala ngoba iyangena endlini ngakho ukungena kwayo akumangalisi kangako yikho ngingeke ngakubikela muntu,” kuchaza uNkkz Moyo.
UNkosikazi Sakhile Ncube ubikele intatheli ukuthi indaba le uyizwile laye kodwa kazange ayibone leyonyoka.
“Indaba le ngiyizwile noma nje inyoka leyo ngingasayibonanga ngoba bathi yabaleka kodwa angikwazi lami ukuthi yayivela ngaphi. Ngakho ngibona angani inyoka le yayizihambela njengezinye izinyoka nje,” kutsho uNkkz Ncube.
Ebuzwa ngale indaba usobhuku wakule indawo uMnumzana Jeremiah Moyo ubikele intatheli ukuthi indaba le kakayizwa.
“Indaba le angikayizwa angazi kumbe basazongitshela ngakho, lami ngizayidingisisa ngizwe ukuthi kuhambe njani ukuze kulungisiswe,” kuphetha uSobhuku uMoyo.
Online Reporter