admin
YiNtatheli kaMthunywa
KAMBE kuyozalwa nkomoni ngeSonto eMagumeni mhla iBulawayo City inxusa iHighlanders kumdlalo wesine weligi yeCastle?
Amathimu womabili angomakhelwane edolobheni lakoBulawayo njalo iqembu laMakhosi liyachinsa ukudlala leBosso kumkhankaso weligi. Amathimu la omabili adibana okwakuqala kumkhosi wenguqu obizwa ngokuthi yiBulawayo Football Festival.
Umqeqetshi weBulawayo City uPhilani ‘‘Beefy’’ Ncube ubika ukuthi kasoze abelendaba lokuthi iHighlanders liqembu elikhulu ngoba ‘‘ukuzwana’’ kuzaphela.
“Akuzwanwa lutho la. Ithimu yami ngiyipheke yavuthwa ukuthi inqobe iHighlanders. Lokho ukuthi singomakhelwane akusebenzi kimi, okumqoka yikunqoba ngoba phela ngumncintiswano lo,” nguNcube lo eqeda ukulolonga abafana bakhe enkundleni yeBarbourfields.
UNcube ukhulume kanje esithi akulanto engamjabulisa ngaphandle kokuthi achumise iBosso enkundleni yeBarbourfields.
Uthe inhloso yakhe yikuthi anqobe kumathimu akoBulawayo ukuze enelise ukuhlala kuligi ephakemeyo kulisizini. Isizini ivulwa, Amakhosi adlala leqembu leHow Mine, lapho enelisa ukubamba izimbamgodi zaba ngutshiki lobhanqa 2-2, kumdlalo okwakukhangelelwe ukuthi anqotshwe.
Inhloso yalumqeqetshi ngokutsho kwakhe yikunqoba wonke amathimu akoBulawayo.
“Nxa singadliwa yonke imidlalo esilayo ngamathimu esakhelane lawo koBulawayo kutsho ukuthi siyaphuma kuPSL. Ngakho ngiyala ukuthi sidliwe yiwo wonke, kumele siwanqobe, sitshengise ukuthi siphakathi kwamathimu abizwa ngokuthi makhulu kuligi.”
Imidlalo yeCastle PSL ekhona kulimpelaviki:
NgoMgqibelo: How Mine v Triangle (Luveve), Chapungu v Tsholotsho (Ascot), ZPC Kariba v Chicken Inn (Nyamhunga), Harare City v Hwange (Rufaro).
NgeSonto: Bulawayo City v Highlanders (Barbourfields), Border Strikers v Mutare City Rovers (Mandava), Dynamos v CAPS United (Rufaro).
NgoMvulo: Ngezi Platinum v FC Platinum (Baobab).
Online Reporter