admin
Cornelius Luphahla
KWENZAKALE insindabaphenduli yendaba esigabeni seDlawa eNkayi ngemva kokuba eyinye indoda ibanjwe xhaka izothela umlilo wemvelo lomalukazana wayo emini ligwaze umhlaba.
Imihlola le yenzakale kuviki ephelileyo lapho uMelusi Ncube abanjwe khona xhaka esemacansini lomalukazana wakhe uLindiwe Dliwayo othethwe nguMthabisi Nkomo, egangeni emini ligwaze umhlaba, uMthunywa uyakuveza lokhu namhlanje.
UMthunywa uxhumane loMnumzana Limukani Ndebele umalume kaMnu Nkomo walandisa ngokubanjwa kukaNcube lomalukazana wakhe.
“Sathi sisiya etshwaleni phetsheya ngilomzukulu wami uMthabisi sasesidlula sikhangela intungo zami esasizigamule sazitshiya esifuleni. Sithe sisahamba sabona nampa abantu ngaphansi kwesixukwana somqathuva.
Ngethuka ngibona ukuthi nguNcube lomalukazana wakhe besemacansini.
“Kwabanzima-ke ukuthi babaleke ngoba sasesiseduze kakhulu lathi safika sama kuphela saphelelwa ngamathe.
Ngelikade ngababuza ukuthi benzani kodwa kabazange bangiphendule. Khonapho-ke sahle saphenduka sabasa ekhaya sayakhuluma njengomdeni. Ngilapha nje kangilankani ngesenzo sikaNcube,” kutsho uMnu Ndebele.
UMnu Ndebele uqhubekele phambili wachaza ukuthi okwenza uNcube agange lomalukazana wakhe yikuthi kathathwanga ngumntanakhe.
“Ngokubona kwami okwenza uNcube agange lomalukazana wakhe yikuthi uMthabisi kasomntanakhe ngowenye indoda. Noma nje kunjalo kufanele uNcube ahlawule agezise uNkomo, kuyazila ukuba ahlale lomfazi onjalo engageziswanga. Ngalokhu-ke sivumelane ukuthi ahlawule inkomo ezintathu, emhlophe eyokugezisa uNkomo, lezimbili ezokuganga lomfazi womnikazi.
“Okunye njalo sivumelane ukuthi abakibo kaMaDliwayo labo kufanele bakhiphe inkomo eyodwa kwezamalobolo ezagwetshwa uNkomo njengoba umntanabo esebanjwe eganga kungakapheli iminyaka emithathu endile,” kutsho uMnu Ndebele.
UNkzn Similo Thwala oyisihlobo sikaNkszn Dliwayo ubikele intatheli ukuthi indaba le iyamethusa kakhulu.
“Indaba yokubanjwa komntanethu loyisezala ingiqeda amandla njalo ngiyaqala ukuzwa into enje. Noma nje indaba le siyikhulume njengomdeni kodwa vele abantu sebekwazi, sinje sihamba nzima ebantwini ngenxa yenhloni,” kutsho uNkzn Thwala.
Kuzwakale ukuthi uNkosazana Lindiwe Dliwayo kakho okwamanje abakwabozala bathe ayelaywa ngakibo okwenyanga ezimbili uzaphenduka ngemva kokuba uyisezala sehlawule uNkomo kwalungiswa langokomkhuba.
Imizamo yokukhulumisana loMnu Nkomo yehlule ngoba ucingo lwakhe kaluzange lwadojwa ngumuntu lwaphetha solungasangeni.
Online Reporter