admin
ABASAKHULAYO abahlala emalokitshi akoBulawayo sebezathi ukulolonga ithalenta labo kwezemidlalo, nanko ikhansili isivumele ukuthi uBenjani Mwaruwari aqhube imincintiswano kuzo.
Lokhu ngokwakuqala kuminyaka eyedlula amatshumi amabili ngoba ikhansili ibisehluleka ukuvuselela izakhiwo lezi ezisabalale phose wonke amalokitshi amadala.
Kube yisimanga njalo ukuthi ngemva kweminyaka yonke le, ikhansili ize yanikeza imvumo. Izakhiwo lezi, ezidume ngokuthi ngama-club kumbe ama-Youth Centre, sezaphenduka amanxiwa, kuthi ezinye besezisetshenziswa ngamabandla okholo.
Ngokunjalo, ngoLwesihlanu ngeviki edluleyo, ikhansili ithe imidlalo yonke eyeBenjani Mwaruwari Community League izaqhutshwa kulezi zakhiwo.
Kukhangelelwe ukuthi ilokitshi lelokitshi libe lethimu yalo yomdlalo wenguqu kuCommunity League le ezaqala kunsukwana ezizayo.
Lokhu kuza kulandela ukusungulwa kweligi yenguqu yabafana abasakhulayo esekelwa nguBenjani.
Ekhuluma lentatheli yephephandaba likazulu ngoMvulo ekuseni, uBenjani uthe imvumo yekhansili izakuba yisiqalo sokuhwatsha ithalenta lebhola likanobhutshuzwayo koBulawayo.
“Mina ngaqala ngidlalela e-club, okuyilapho engathapha khona ulwazi ngenguqu lokuthi ngilalo ithalenta kulumdlalo. Ngokunjalo, abantwabethu kumele sibenzele ngendlela lathi esakhula ngayo.
“Ikhansili ivumile ukuthi sisebenzise inkundla zayo. Siyakwamukela lokhu ngoba kuzakhulisa umdlalo, kukhulise uBulawayo lenguqu yelizwe lonke.”
Uthe ufisa ukuthi labanye abadlali abadlula enkundleni zasemalokitshini bakwamukele ukuthi kungumlandu wabo ukuthi bancedise abasakhulayo.
UMwaruwari, owazakhela udumo kumaqembu atshiyeneyo kwele-Europe, waphinda wabangukaputeni wama-Warriors, uthe imidlalo yonke izaphathwa yiBM Sports engaphansi kweBenjani Mwaruwari Foundation.
Online Reporter