admin
Thokozile Mbedzi
ZILOKHU zinkemile izakhamizi zesigabeni seSukwi eGwanda ngemva kokuba enye indoda isele ingasela lihlo kulandela ukuhlaselwa ngoguluva emzini wayo andubana badle bayibayi lemota yayo.
UMnumzana Tom Ncube oleminyaka engu-80 yokuzalwa ungenelwe ngoguluva emzini wakhe phakathi kwamabili kuviki ephelileyo bantshontsha imota.
Ekhuluma lentatheli kaMthunywa uMnu Ncube uthe lokhe etshwaqe umzimba.
“Lokhe ngiphethe izibindi ngalokhu okwangehlelayo. Amasela la afika ethinta inkomo ezilamabhela emzini wami phakathi kobusuku silele.
“lnkomo lezi babelokhu bezibhodisa egumeni zitshaya amabhela kanti benzela ukuthi bafuqe kuhle imota bayisuse egumeni. Umsindo wenkomo ezasezigcwele egumeni wangihlupha ngaze ngavuka ngaphuma phandle ngathi ngisithi mehlo suka ngamangala imota yami isikhitshwelwe phandle kweguma kodwa amakhiye ngilawo endlini.
“Ngisathi ngikhangelisise omunye wamasela la wahle wangihlaba nge-torch emehlweni ngisithi ngibuyele endlini basebengigombolozela bathi ngiyangaphi. Elinye lamasela la laselisebenzisa isikhali engingasaziyo ukungihlahlela ebusweni.
“Ngemva kwalokho lami kangikwazi ukuthi kuyini okwenzakalayo ngoba ngaze ngayaphaphamela esibhedlela, kodwa kukhanya bangihlahlela kanengi lekhanda ngoba amanxeba manengi athungiweyo. Ilihlo lona lahle lafa,” kuchasisa uMnu Ncube ngelodabukileyo.
“Emoteni kwakulempahla zangekhaya engangizithenge emkambo (eshowa) wenkomo kunye lezinye ezabomakhelwane ababengiphathise zona ukuthi ngibathwalele.
“Ngasebenza iminyaka engu-41 ngisebenza nzima ngisenzela ukuthi nxa sengithethe umhlalaphansi ngingadubeki kodwa sebengintshontshele ngitsho lenkomo sezize zaphela.
“Khathesi sebentshontshe imota yami baze bangigamula lelihlo lafa, lihle lakhutshwa esibhedlela. Ngilesicelo kumapholisa akithi ukuba kabazame ngazo zonke indlela ukuba basivikele ikakhulu emaphandleni ngoba inengi lethu sesibadala.
“Ngikhuluma nje ngingasila kumele ngibuyele ekhaya kodwa sengihlalele evalweni funa babuye bezongihlasela futhi,” kuphetha uMnu Ncube.
Online Reporter