admin
Cornelius Luphahla
KULEQEMBU lomculo kamaskandi elidabuka khonapha koMthwakazi elithiwa yiNsukamini elikhiphe iDVD emangalise abahlabeleli bakuleli kunye labeSouth Africa.
I-DVD le elengoma ezingu-13 kugoqela ezedlalade elithi Lukhulu Luyeza lelithi Iqhawe lakoMhlahlandlela iphume ngoMgqibelo kuviki ephelileyo eHilbrow Theatre lapho obekulomkhosi wokuyibukisa emphakathini. Umkhosi lo kukhanya uqumbaqumbe uzulu wonke nanko phela kuze kwajabula ngitsho leNdlunkulu kaMzilikazi ebizwa ngokuthi ngaMaNtungwa ephuma lapha koMthwakazi.
UMthunywa uxhumane lomunye wabaholi beqembu leNsukamini uChristopher Ncube ochaze ukuthi bayajabula kakhulu ngoba kukhanya benze umsebenzi obukekayo.
“Siyajabula kakhulu ngoba umsebenzi lo esiwenzileyo uthakazelelwa nguzulu wonke okuchaza ukuthi senze into enhle kakhulu. Ngitsho ngoba emkhosini lo besilamaqembu abaculi abehlukeneyo edlula i20 bezojabula kanye lathi njalo bezosincedisa. Lokhu kuyasiphakamisa njalo kusenza sibe ledlabuzane lokuqhubekela phambili sisenza okuhle.
“Okunye njalo leli iDVD esilikhuphileyo lilengoma ezingu-13 njalo ngendlela esilipheke ngayo ngiyazi kakho umuntu ongasola ngoba besijonge ukujabulisa abantu hatshi ukubasolisa yikho silipheke lavuthwa. Ngakho-ke ngithi abalandeli bomculo wethu baqhubekele phambili besisekela lathi sizabenzela okuhle okwedlulisileyo,” kutsho uNcube.
Amaqembu la akhuphe idlalade leli endawonye ngesizatho sokuthi akhokhelwa ngabantu abafanayo abuye njalo aculelwe ngabantu banye yikho nje ephathisene ekukhipheni idlalade leli.
Ekhuluma lentatheli omunye wabaholi beqembu leNsukamini uJunior Ngwenya uchaze ukuthi laye uyathaba kakhulu ngoba uMthwakazi utshengisa ukuthuthuka kwezomculo.
“Ukukhipha kwethu iDVD le kuyangijabulisa kakhulu ngoba kusichazela ukuthi koMthwakazi sesithuthukile ngezomculo kamaskandi. Ngitsho ngoba labaculi beSouth Africa bawuncomile umsebenzi wethu lo batsho lokuthi singabokuqala koMthwakazi ukukhipha iDVD emnandi kangaka.
“Amanye njalo amaqembu la avumile ukuthi asasemuva kwethu ngezomculo noma nje aqala kudala ukucula okuchaza ukuthi iDVD le siyipheke kuhle kakhulu. Ngalokhu-ke kutsho ukuthi lobuzwe bukaMthwakazi buyavuseleleka ngoba umculo wethu ukhuthaza kakhulu ngokuvuselela isizwe sikaMthwakazi.
“Ngakho-ke ngithi bonke abathanda umculo kamaskandi kabakhululeke ngoba sisazobavakatshela sibenzele ukudla kwamehlo lendlebe njalo lama-DVD ethu sisazowasakaza indawo yonke,” kuphetha uNgwenya.
Online Reporter