admin
Cornelius Luphahla
Inhlanganiso ekhangela ngezemvelo iEnvironmental Management Agency (iEMA)ikhuthaza izakhamizi zakoBulawayo ukuba zihlanze indawo ezihlala kuzo kanye labatshayeli bezimota ukuba bahlale lamagabha okulahlela ingcekeza ngenhloso yokuphungula ingcekeza kulelidolobho.
Inkokheli zale inhlanganiso zikhuthaze ngokuhlanzeka lokhu ngoLwesihlanu kuyonale iviki lapho obekulomkhankaso wokuhlolwa kwengcekeza edolobheni lakoBulawayo lonke jikelele.
UMthunywa ukhulumisane loProvincial Environmental Manager wale inhlanganiso lapha koBulawayo uMnumzana Decent Ndlovu wachaza ukuthi uBulawayo usethuthuka kancane ngezokuhlanzeka.
“Lokhu saqala ukukhuthaza ngokuhlanzeka lapha koBulawayo inengi lamalokitshi kukhanya liyathuthuka ngezokuhlanzeka noma nje kukhona amanye amalokitshi angenzi kuhle,” kutsho uMnu Ndlovu.
UMnu Ndlovu uqhubekele phambili njalo wachaza ukuthi inhlanganiso ye-EMA yenza umkhankaso lo ihlangene leKhansili yakoBulawayo njalo amalokitshi angenzi kahle azahlawuliswa.
“Umkhankaso wokukhuthaza ngokuhlanzeka sawusungula ngemva kokunanzelela ukuthi inengi lamalokitshi alapha koBulawayo lingcolile njalo sakusungula lokhu sileKhansili yakoBulawayo. Ukungahlanzeki lokhu kudala imikhuhlane eminengi etshiyeneyo.
“Sinanzelele njalo ukuthi ingcekeza le yiyo edala ukuthi izititshi zamanzi ezilapha koBulawayo zivaleke ngoba ingcekeza le egoqela amaphepha ingangena ezikhaleni zezititshi iyavala indlela yamanzi isititshi siphethe sidubuka.
“Ngalokhu-ke sesasungula umthetho wokuthi umuntu engabonakala elahla ingcekeza endleleni ahlawuliswe imali yokwandisa ingcekeza edolobheni. Ezinye indawo esesizinanzelele ukuthi zigcwele ingcekeza kulapha okuhlala khona amapholisa eku-road block ngakho esesizakwenza yikuthi siwahlawulise imali ehlawulwa ngabanye abantu ngokungahlanzeki,” kutsho uMnu Ndlovu.
Kubikwa imitshova kanye lamabhasi ahamba engela magabha okugcinela ingcekeza sezahlawuliswa imali ngenhloso yokuphungula ingcekeza ngenxa yokuthi ingcekeza le kukhanya yandiswa ngabantu abagada izimota lezi ngenxa yokuswela abangayilahlela khona.
Ekhuluma kulo umkhankaso uSenior Public Relations Officer uNkosazana Nesisa Mpofu uchaze ukuthi uyajabula ngoba uBulawayo uveza ukuthuthuka ngokuhlanzeka.
“Kuyajabulisa ukuthi uBulawayo utshengisa ukuthuthuka ngokuhlanzeka ngoba semalutshwane amalokitshi alengcekeza lapha koBulawayo noma nje kusilela kwamanye afana leMakhokhoba. Lokhu kuveza ukuthi ilokitshi leli lisadinga imfundiso enkulu ngokuqakatheka kokuhlanzeka”, kuphetha uNkszn Mpofu.
Online Reporter