Online Reporter
Nkosilathi Sibanda
UMBUKISO we-Zimbabwe International Trade Fair (ZITF) uyinsika kuhlelo lukaHulumende lokuthuthukisa lokuvuselela amankampani akuleli, kukhangelelwe ukuthi kuvuswe umkhonomi welizwe, kuphakanyiswe impilo zabantu.
Lokhu kukhulunywe nguMphathintambo wogatsha lwe-Industry and Commerce uNqobizitha Ndlovu, ngesikhathi esamukela izivakatshi enkundleni yeZITF koBulawayo ngoMvulo.
Leli lihlandla lesi-65 lombukiso weZITF, eqale ngoMvulo, isiyagqitshwa ngoMgqibelo. Iqhutshwa ngaphansi kwendikimba ethi, “Industrialisation: Crafting an Integrated Economic Landscape.”
UMphathintambo uNdlovu uthe indikimba le iveza qho inyathelo likaHulumende lokufuna ukuvuselela umkhonomi welizwe ngokuthuthukisa amabhizimusi, ikakhulu amafemu alungisa impahla ezilakho ukuthengiselwa kwamanye amazwe.
“Singafinyelela ukukhulisa umnotho welizwe nxa sigxila kakhulu ekuthuthukiseni amankampani. UMongameli Mnangagwa usenxuse ukuthi sithuthukise ilizwe lethu, ngokusungulwa kwamankampani, lokuvuselela lawo akhona. Ngakho-ke, sithatha lelithuba le-Zimbabwe International Trade Fair ukuthi siphathise amankampani ethu, sinxuse lamanye aphandle kwelizwe,” kutsho uMphathintambo uNdlovu.
Uthe balokuthaba ukuthi lonyaka kubuye amankampani amanengi azimele wodwa, okwenze indawo yokubukisa yagcwala. Ukwanda kwamankampani, ngokutsho kukaMphathintambo uNdlovu, kube yimpumelelo yohlelo lwe-National Development Strategy 1, lombono kaHulumende wokuphakamisa umkhonomi kusiyafika umnyaka ka2030.
“Sifuna ukuthi amankampani azimele wodwa akhulume ngokuphumelela komnotho welizwe. Savumelana ukuthi lonyaka iZITF ibanjwe ngamankampani la. Sizaqhubeka sikwenza lokhu.”
Lonyaka kulamazwe angu-28 abukisa impahla ezitshiyeneyo.
