Online Reporter
Bhekimpilo Tshalibe
ABALIMI endaweni ezehlukeneyo sebekhuthazwe ukuthi baqedise ukuvuna umumbu emasimini ngoba ukuphuza ukwenza lokhu kulakho ukubangela ukuthi balahlekelwe yisivuno sabo.
UMnumzana Christopher Katsande ongu-Agricultural Extension Officer kugatsha olubona ngezoMhlabathi, Amanzi kunye loKuthuthukiswa Emaphandleni uthe abalimi kabaqedise ukuvuna umumbu emasimini ungakehli isisindo.
Uthe umumbu ungawoma kakhulu ucina suphambaniseka.
“Sikhuthaza abalimi ukuthi baqedise ukuvuna umumbu wonke oseleyo emasimini ungakawonakali ngoba ulakho ukucina ususonakala,” kutsho uMnu Katsande.
Uthe ukhuthaza abalimi ukuthi bavune umumbu ungakapheli ubumanzi ngoba ucina ususehla isisindo.
“Sikhuthaza abalimi ukuthi bavune umumbu usalobumanzi obuyi-11 phesenti njalo bayewuthengisa eGrain Marketing Board (GMB) usaselesisindo,” kutsho uMnu Katsande.
Uthe ukhuthaza abalimi ukuthi bevalele amasimu abo ukuze inkomo zingangeni.
“Sikhuthaza abalimi ukuthi bengangenisi inkomo ukuthi zidle amahlanga omumbu emasimini ngoba ubulongwe benkomo buyaphambanisa isimo somhlabathi,” kutsho uMnu Katsande.
Uthe amahlanga omumbu aqakathekile.
“Sikhuthaza abalimi ukuthi bendlale amahlanga omumbu omileyo emasimini ukwenzela ukuthi abambe ubumanzi emhlabathini,” kuphetha uMnu Katsande.
