Online Reporter
Kuviki ephelileyo siphethe ngokukhangela ukusetshenziswa kwesinciphiso. Lapha siqala ngokukhangela ukwakhiwa kwesinciphiso. Nanzi ezinye izinciphiso: umuzi > umuzana, isihlahla > isihlahlana, isalukazi > isalukazana, umlenze > umlenzana, indlu > indlwana, ibizo >ibizwana. Siyananzelela ukuthi amabizo acina ngonkamisa –a kumbe –e kumbe -i kumbe –o kumbe –u. Ukwakha isinciphiso – wonke la amabizo asebenzisa isijobelelo sesinciphiso u-ana. Lawa acina ngonkamisa –a, -e lo-(i), uyabasusa lapha onkamisa ubusujobelela isijobelelo sesinciphiso u-ana endaweni yabo. Lawo amabizo acina ngonkamisa –o kumbe –u uyabangwaqazisa laba onkamisa babe ngosingankamisa –w- besekujotshelelwa isijobelelo sesinciphiso u-ana.
Izibonelo: isihlahl(a) + -ana >isihlahlana; umlenz(e) +ana >umlenzana; umuz(i) + ana > umuzana kodwa: ibiz(o) + w +ana >ibizwana, induk(u) + w +ana >indukwana.
Nanzelela: Emabizweni acina ngonkamisa u –o lo –u njengasemabizweni –ibizo, induku; unkamisa u-o lo -u abasuswa, kodwa bayangwaqaziswa babe ngusingankamisa u-w-.
Asekhona amanye amabizo asengaba ludubo ekwakheni isinciphiso. Lawo yilawo alondebembili kumbe unsinini elungeni lokucina. Lowo ndebembili kumbe nsinini uguquka abe ngulwangeni anduba kujotshelelwe isijobelelo sesinciphiso u-ana, ngemva kokususa unkamisa wokucina webizo.
Izibonelo: Nansi inguquko yabondebembili labonsinini besiba ngolwangweni ngaphansi kwezihloko ezimbili; Ondebembili lo Olwangeni. Ngizanika izibonelo ezimbalwa, sizakupha ezinye ngeviki ezayo: Ondebembili p(ipopo) > Olwangeni> tsh(ipotshana); ph (impuphu)>tsh (imputshana); bh(isigubhu) >j(isigujana); b(inkabi)> tsh(inkatshana).
