admin
Cornelius Luphahla
IZAKHAMIZI zeLupane zikhuthazwa ukuthi ziqakathekise ilala njengesihlahla njengoba kuyilo elibathuthukisayo ngokulisebenzisa ukuthunga izitsha okuyizo ezibanika inzuzo.
Lokhu kukhulunywe nguMqondisi wogatsha lweSmall and Medium Enterprises uMnumzana Masawuso Phiri emele uMphathintambo wogatsha lweSmall and Medium Enterprises uNkosikazi Sithembiso Nyoni emkhosini wokubukisa izitsha kanye lokukhitshwa kogwalo obuseLupane Women’s Centre obukhona mhlaka 13 kusiya ku14 Mfumfu.
Ekhuluma emkhosini lo uMnu Phiri uthe izizalwane zeLupane zizigqaje ngelala lazo eselizithuthukisile njalo zingadeli ukusebenza gadala ukuze zithuthuke ngamandla.
“Ngikhuthaza izizalwane zeLupane ukuthi zingadeli ukuzithuthukisa ngelala ngoba yilo elikhona kule indawo.
Endaweni ezifana leNyathi izakhamizi zakhona zizithuthukisa ngokugebha igolide ngakho lapha eLupane igolide lakhona lilala. Ngokunjalo kuqakathekile ukuthi likhuthalele ukuthunga izitsha zelala ukuze lithole imali ngemva kokuzithengisa,” kutsho uMnu Phiri.
UMnu Phiri uqhubekele phambili njalo wathi iLupane Women’s Centre sisuswe ekubeni ngaphansi kwe-Micro enterprise yaba yi-Small and Medium Scale Enterprise.
“Ngenxa yemisebenzi yayo emihle kanye lokuthuthuka kwayo iLupane Women’s Centre sisuswe ekubeni ngaphansi kwe-Micro Enterprise yaba ku Small and Medium Scale Enterprises. Lokhu kuyindlela yokuyithuthukisa ngamandla njalo kuchaza ukuthi amalunga ayo ayasebenza sibili.
“Ngalokhu-ke uHulumende usazoyincedisa layo njengezinye inhlanganiso ezikulelizinga. Okunye njalo ngikhuthaza wonke umuntu ukuthi nxa lapho ahlala khona kulelala kathunge izitsha aqale laye ukuthengisa. Akukhathalakile ukuthi uhlala ngaphi kodwa uyenelisa ukuzithuthukisa ngelala,” kutsho uMnu Nyoni.
UMqondisi wenhlanganiso yeLupane Women’s Centre uNkosikazi Hildegard Mufukari ekhuluma emkhosini lo uthe amalunga ale inhlanganiso atshengisa ukuthuthuka kakhulu njalo inhlanganiso le iyakhula.
“Wonke amalunga ale inhlanganiso atshengisa ukuthuthuka okukhulu ngoba abanye babo sebathenga izifuyo ezitshiyeneyo ngenxa yemali abayithola ngemva kokuthunga izitsha zelala. Abanye babo sebathenga izindlu edolobheni leLupane.
“Lokhu kuyajabulisa kakhulu njalo kuveza ukuthuthuka kwenhlanganiso ngenxa yemisebenzi yezandla. Ngalokhu ngikhuthaza uzulu ukuthi ofuna ukuba ngomunye wamalunga la kakhululeke ukuze azithuthukise laye,” kuphetha uNkkz Mufukari.
Online Reporter