Online Reporter
Nkosilathi Sibanda
IZIKOLO zidlala indima ebalulekileyo ekulolongeni abafundi abaphatheka kwezemidlalo, ngakho kumele zincediswe ukuthi zibe lenkundla ezifaneleyo.
Lo ngumbono owethulwe ngumgcinisihlalo weLupane Local Board uMnumzana Thandolwenkosi Nyoni, ochaze kabanzi ngokuzimisela kwabo ekuthini abantwana beLupane bathole indawo zokutshengisela ithalenta labo kwezemidlalo.
Uthe kusehlelweni lwabo ukuthi bakhe, bavuselele inkundla ezibizwa ngokuthi ngamaHigh Performance Centre ezikolo ezingaphansi kweLupane Local Board, ikakhulu eMabhikwa High School.
IMabhikwa High School ngesinye sezikolo ezingaphansi kweLupane Local Board. UMnu Nyoni uthe ukuqakathekiswa kwenkundla zemidlalo ezikolo kubalulekile ngoba kuyaphathisa lakunhlelo zenhlalakahle kazulu.
Phezulu kwalokhu, umsebenzi lo umunyethwe lakuMaster Plan yabo, eseyavunywa nguHulumende, egxile ekukhuliseni idolobho.
“Ekukhuliseni kwethu idolobho sikhangele njalo lokuthi kumele sivuselele indawo zemidlalo ezikolo lasemphakathini. Ngokwenza lokhu sihlose ukuphakamisa inhlelo zomphakathi lokulungisela abantwabethu abasezikolo ikusasa elihle,” kutsho uNyoni.
UNyoni, odume njalo ngokuphathisa kakhulu ezikolo ezisemaphandleni eLupane, uthe akumelanga ukuthi abafundi abalesiphiwo semidlalo baqale ukuhlakanipha sebesemadolobheni.
“Ukukhanya kumele kuqale lapha eLupane. Nxa umntwana ofunda eMabhikwa High edlala inguqu ngokwesipho sakhe sikaNkulunkulu, kumele simuphe ithuba lokuthi alolonge enkundleni eziseduzane laye. Lesi yisikhathi sokuthi konke okusedolobheni kube khona lakithi, abantwabethu bathole amathuba afanayo.”
Umbono weLupane Local Board wamukelwe yizakhamizi zakulindawo, ezibike ukuba zalinda ukuthi kuvulwe amagceke ezemidlalo.
“Nxa besitshi lokho, siyakubongela sibili. Sesinanzelele ukuthi esikhathini esinengi abantwabethu baswela okokwenza bacine sebetshona phambili kwezitolo.
“Kayisikho lokho. Okuyikho yikuthi kuvulwe indawo lapho abazazitshengisela khona kwezemidlalo yebhola kumbe nje leminye imidlalo ebalisela lokulingisa. Ngibona angathi yikho okusilelayo lapha eLupane. Okwemisebenzi siyakubona kodwa phela ukukhula komuntu kumele kusekelwe zinhlelo ezinengi,” kutsho uMnu Mkhaliphi Ncube.
Isazi kwezenhlelo zengqubekela phambili kazulu, osebenza kuziqinti zeLupane, uMnu Tawanda Mazango uthe: “Nxa sikhangele ukukhula kweLupane jikelele, kumele sikhulume ngokuba khona kwezinto ezinengi. Ukukhula kwamabhizimusi kutsho ukuthi kuvuleka amathuba emisebenzi, kuqhatshwa intsha yalapha.
“Abafundi ezikolo kumele bathole amathuba ekukhuleni kwendawo. Sibalisa inkundla zemidlalo, indawo zokuchitha isikhathi abantwana befundiswa ngokuthile empilweni, ikakhulu ukwabelwa ulwazi lokulolonga amathalenta abo.”
