Online Reporter
Ethel Ncube
KULAMADODA amabili abhacwe eDongamuzi eLupane ngemva kokuntshontsha inkomo ezifika 51.
Indaba le ivele ngempelaviki lapho izakhamizi ezilandele khona amasondo enkomo aze ayafika lapho obekugcinwe khona inkomo zithengiswa.
Ekhuluma lentatheli omunye wezakhamizi zeDongamuzi ubike ukuba babambane beyisigaba lenduna kwancediswana ukuba imigulukudu le ibanjwe njengoba izakhamizi beseziphelelwe zinkomo zitshontshwa.
“Umnikazi wenkomo lezi usemazweni aphetsheya, ekhaya kulesisebenzi esigcina inkomo esiyiso esabikayo ukuba inkomo ziyatshontshwa. Kuthe kunjalo walonda amasondo enkomo ayamfikisa lapho ezazikhona wasebikela izakhamizi.
“Induna uMenyezwa yasukumela phezulu isizwa lokhu, yasincedisa saze sabamba amadoda amabili uNkosi loZenzo loba singasatholanga izibongo zabo,” kubika isakhamuzi lesi
Intatheli ixhumane lenduna uMenyezwa mayelana lemigulukudu ebanjwe endaweni yakhe.
“Abantu laba bebetshontsha inkomo bethengisa besiyakwenzisa ama-clearance zithengiswe umnikazi engakwazi. Endaweni yami angivumeli izinto ezingayisizo, ebantwini balapha inkomo ziyingxenye yenotho yezakhamizi.
“Omunye esimbambileyo simhambise emapholiseni kuthi omunye laye simbambile inkomo ezitholakeleyo zizagcinwa enduneni kulindwe ubufakazi obugcweleyo ukuba umnikazi abuye azithathe,” kubika induna uMenyezwa.
