admin
YiNtatheli kaMthunywa
ISIKOLO seMagwegwe High koBulawayo asehlulwa yilutho kwezomdlalo webhola likanobhutshuzwayo nanko sesisondelele ukuthi sithole inkezo ezimbili ezimqoka kwezemidlalo kuleli.
Kulimpelaviki ithimu yamantombazana kulesi isikolo izadibana lezinye ezilitshumi lanye kudlalelwa inkezo yeCopa Coca-Cola Under-17, edolobheni leGwanda.
IMagwegwe High izathi iqeda ukuncintisa eGwanda ingene umango iqonde enkabazwe ukuyamela isabelo sakoBulawayo kumidlalo yeNash Under-20. Amathimu amabili akulesi isikolo abhuqe zonke ezakoBulawayo okweminyaka emithathu ilandelana.
Kuqula labafana, ama-Under-16, iBulawayo izamelwa yiSobukhazi, echinsa ukuyafika kuma-finals omncintiswano lo olomvuzo omkhulu okwedlula yonke eyenguqu ebuthanisa izikolo. Umvuzo wethimu ezanqoba inkezo yeCopa Coca-Cola ubiza i$6 000.
Abadlali beMagwegwe High uMitchel Joseph loPrimrose Ngwenya bakhangelele ukuthi bahlasele phambili ngokuhlohla amabhola amanengi.
Isabelo seMatabeleland North sizamelwa yisikolo seSojini kumantombazana, ikanti iMatabeleland South izafaka amathemba kuThekwane leColleen Bawn. Kuqula labafana, isabelo seMatabeleland South singadlalela ku-final ngokuqina kwabafana besikolo seMzingwane, okuyisona esanqoba inkezo yeCopa Coca-Cola ngo2012 eFolosi.
Umphathisikolo weGwanda High uArthur Maphosa ubike ukuthi imincintiswano enjengale kumele ibe yinkuthazo kuzikolo ukuthi ziqalise ukulolonga amantombazana kunguqu.
“Abantwana abangamankazana bayaswela amathuba okuzibonakalisa kundawo ezinengi, kodwa imincintiswano yenguqu enjenge Copa Coca-Cola inikeza ithuba lokuthi abantwabethu baveze ithalenta labo.”
Izikolo ezizancintisa kuCopa Coca-Cola yalonyaka:
Amantombazana: Magwegwe (Bulawayo), Thekwane leColleen Bawn (Mat South), Sojini (Mat North), Utongani (Midlands), Nyamauru (Manicaland), Rufaro leChidyamakono (Masvingo), Malbereign (Harare), Gotora (Mash East), Vimbai (Mash West), Chipadze (Mash Central).
Abafana: Sobukhazi (Bulawayo), Mzingwane leGwanda High (Mat South), Tohwe (Mat North), Guinea Fowl (Midlands), Pamushana le Dewure (Masvingo), Devuli (Manicaland), Chemhanza (Mash East), Churchill (Harare), Rujeko (Mash Central), Chinhoyi (Mash West).
Online Reporter