admin
Buhlebenkosi Gaule
KULENDODA yeTshanyaungwe eGwanda ezapika iminyaka engu-25 kulandela ukutholakala ilecala lokutshontsha inkomo eziyisithupha.
Umsolwa uReason Nkomo oleminyaka yokuzalwa engu-54 utholakale elecala lokutshontshela izakhamizi zeZezana eGwanda inkomo eziyisithupha.
Kubikwa umsolwa wabanjwa xhaka ethwele inkomo lezi ngemota ezisa koBulawayo ngamapholisa.
Umtshutshisi kulelicala uMnumzana Takunda Mafudze ubikele inkundla ukuthi uNkomo kaqalisi ukutshontsha ngoba wake watshontsha inkomo eBeitbridge ngomnyaka ka2001 wabanjwa waphiwa isigwebo seminyaka engu-18 kodwa sewaphuma ejele.
Inkundla izwe njalo ukuba umsolwa kusigwebo seminyaka engu-18 ayesiphiwe kazange ahlale ejele iminyaka emihlanu.
Kubikwa uNkomo watshontshela abantu abatshiyeneyo inkomo zabo wasezitshintsha impawu efaka olwakhe esenzela ukuthi abanikazi benkomo bengabizazi. Kuvele njalo ukuthi inkomo lezi zabonwa ngomunye owayelusile zisemoteni eSigodini okwenza watshayela umnikazi wophawu ebuza ukuthi uyathengisa na inkomo yakhe. Lokhu yikho okwenza kwabonakala ukuthi inkomo le yayidingwa njalo yayisifakwe uphawu lukaNkomo.
Igqwetha likaNkomo uMnumzana Thompson Mabhikwa ucele ukuba uNkomo engaphiwa isigwebo esinzima kakhulu loba ubesephinda ukwenza icala elifanayo.
Umantshi uNkosazana Sheila Nazombe ugwebe uNkomo iminyaka engu-25 ejele wanika isizatho sokuba umsolwa ufana lenja ethi ingaqhoba ithambo iyejayela kungakho kumele ayehlala isikhathi eside ejele esebenza nzima.
Online Reporter