admin
Nkosilathi Sibanda
IQEMBU leBidVest Wits kuzamele lehlukane le-1 miliyoni randi nxa lifuna ukuthenga umdlali weHighlanders uKnox Mutizwa.
Kuliviki abafakazi abaqotho kwezikaMagebhula babike ukuthi abacuphi beBidVest Wits baxhumane lenkokheli zeBosso bebika ukuthi basaqhubekela phambili ngoMutizwa.
Nxa uKnox engathengwa nge-1 miliyoni randi, kutsho ukuthi uzabe engumdlali wakuqala ukuthengwa ngemali ecacayo kumbali yeBosso.
Umaqhuzu weBidVest Wits uJose Ferreira ubike ukuba imali efunwa yiBosso inengi kakhulu kodwa nxa bezavumelana, uKnox uzadlalela eGoli kusizini ezayo.
Umaneja kaKnox, uGibson Mahachi uthe kafuni ukukhuluma ngemali ebizwa yiHighlanders.
“IHighlanders isikhulumile ukuthi ifuna malini, kodwa angeke ngikuveze kuphephandaba,” nguMahachi lo.
Umaqhuzu weHighlanders, uNdumiso Gumede uthe kuliqiniso ukuthi basakhuluma leBidVest Wits.
“Indaba le sisakhuluma ngayo. Ukuyibamba ngekhanda yikho okungayisikho. Angithi kuyaziwa ukuthi uKnox kumele ayekuBidVest Wits, okwamanje usasengumdlali wethu. Okunengi ngalindaba kuzabikwa emphakathini ngokuya kwesikhathi.”
UMutizwa wahlohla amabhola angu-14 kumidlalo engu-17 ngesizini edluleyo.
Okwamanje ungomunye wabadlali abatshibilikela iqembu lamaWarriors kunkezo yeAfrican Nations Championships, iChan, eseRwanda.
Online Reporter