admin
Ophezulu Stinta
SIQHUBEKA ngemibhalo ngemihlobo yezingoma ezitshiyeneyo, sinanzelela ukuqakatheka kwezingoma ngezinga eliphezulu kakhulu sinanzelela ukuthi zingumlomo thile, wezikhulumi ezithile njalo.
Siqhubeka ngomhlobo lo owengungu esike saxoxa ngawo ngeviki edlulileyo, ingoma yengungu le ibibalulekile kakhulu, enkosini, lapho okwakukhethwa khona usuku thile ngemva kokubhulwa kwamabele, kumiswe ilanga lokujabula kanye lokubonga ekadeni ke bekukholelwa ukubonga abaphansi.
Kuthiwa yibo ababusise isizwe, njalo kukholelwa ukuthi yibo abananza isizwe, ngakho ibisitsha ingoma yengungu.
Ngelanga elikhethiweyo abesifazana babechola imithombo, kulungiselwa ukupheka utshwala abesilisa bona babebona ngogazana, balungise njalo indawo yokuthokozela.
Umhlobo wengoma zesigubhu. Umhlobo lo ngomunye lawo owokuzithokozisa, umhlobo lo ke ubuvame emthimbeni kanye lasemkhosini wamalobolo lapho kubongwa abakhwenyana ngemva kokuhlonipha kwabo isivumelwano samalobolo.
Sinanzelela isifundo esikhulu lapha esokuthi ingoma bezisakha njalo ziqinisa ubuhlobo phakathi kwemuli ezitshiyeneyo. Umhlobo wesigubhu ke wona wawuvame nje ukuthi kuzabe kusina abatsha kakhulu, abesintwana okulapho amajaha lawo ayabe ezingela khona ngomkhuba wokukhula.
Kwande ukuxubaniswa ingoma ezimbili, isigubhu kanye lesitshikitsha umahluko okhona ke phakathi kwazo zombili yikuthi isitshingo siqakezelwa kakhulu ngezandla kuthi ke isigubhu sona siqina ngohlobo lwengungu, ukuqakeza ke lapha kugajelwa luhlobo lwengungu.
Online Reporter