admin
OWAKE wabangumdlali weHighlanders uKnox Mutizwa uthe sekungenzakala loba yini kuligi yeDStv Premiership ngoba laye uzibona ephakamisa iqembu lakhe leLamontville Golden Arrows.
UMutizwa uthe ukwenza kahle kweqembu lakhe emidlalweni yeligi kuyabakhuthaza. Uthe kubenza bacacelwe yikuthi kungenzeka loba yini emidlalweni elandelayo yeligi, nanko sebengasilwela isicoco seDStv Premiership.
UMutizwa (27), ngomunye wabadlali abamqoka ku-Arrows edlala ngokuzikhandla kulezi zinsuku.
Okwamanje iArrows ihlezi endaweni yesibili ku-log yePremiership. I-Arrows itshaye iTshakhuma Tsha Madzivhandila nge 2-1 koweDStv Premiership, e-Old Peter Mokaba Stadium ePolokwane, ngoLwesithathu olwedluleyo.
Umgadli lo utshaye ibhola lesibili kulumdlalo onqotshwe yi-Arrows kwathi elesibili lavalelwa phakathi nguSiboniso Conco. Abafana Bes’thende bahlezi endaweni yesibili ku-log ngemklomelo engu-35 emidlalweni engu-19, sebehlukaniswe ngowodwa leMamelodi Sundowns ehlezi phezulu ngemklomelo engu-36.
“Njengamanje izinga lokuzethemba kithi, lakimi liphezulu kakhulu futhi silakho ukubhekana laloba yiliphi iqembu lePremiership, kungakhathalekile ukuthi sidlala lalo ngaphi.
“Umoya wokuzethemba yinto ebalulekeyo kakhulu kuwo wonke amaqembu, okuyinto-ke lathi esilayo. Kodwa phezu kwakho lokho esikwenzileyo kulisizini, senza konke okusemandleni ethu ukuthatha izinto kalula ngoba kusasihambela kahle okwamanje. Kubalulekile kakhulu,” kutsho uMutizwa.
“Kuyasikhuthaza kakhulu ukuzibona sikule indawo ku-log njengamanje. Yebo kuyisifiso sawo wonke umdlali odlala kuPremiership ukuwina isicoco seligi, kodwa thina asikakufaki ezingqondweni zethu ukulwela isicoco seligi njengamanje,” uMutizwa.
Online Reporter