Online Reporter
YiNtatheli kaMthunywa
KULEMIFANEKISO evele kunkundla yokuxhumana iFacebook, ngeviki ephelileyo yonxiwa olusesigabeni seGqalaza eGwanda ngaphansi kwenduna uMathema osoludonse amehlo abantu nanko phela kubikwa phakathi kwalo kulempahla ezileminyaka eyedlula engu-35 zatshiywa ezingagugiyo.
Impahla eziphakathi kwenxiwa leli zilokhu zikusimo sazo njalo imiduli lophahla lomuzi lokhu kumi ngendlela okwakwakhiwe ngayo.
Imifanekiso le ephoswe kuFacebook ngenye indoda ebivakatshele kulindawo iveza ukuthi imuli eyayihlala lapho okungasatholakalanga ukuthi ngeyakobani yathutha yatshiya impahla phakathi kwendlu yahamba yahawula.
Isakhiwo lokhe simile loba amafasitela leminyango kukhanya ukuthi kwatshontshwa.
Kulezinye impahla eziphansi ezigoqela umbheda, ibhokisi lempahla, imbiza, ibhakede lokunye. Loba abaninimuzi bathutha kudala uMthunywa uzwe ukuthi izakhamizi zakule indawo ziyesaba ukungena phakathi konxiwa lolu ngoba zicabangela ukuthi lindlu ilezipoko okwenza kungabilamuntu osondelayo.
Induna yalindawo uKhulumani Mathema ithe njengomkhokheli wesigaba isizwile ngaloludaba njalo ike yayafika kulolonxiwa ukuze iqinisekise lokhu okukhulunywayo.
“Udaba lolu ngiqale ukuluzwa ngeviki ephelileyo, sengike ngafika emzini lo loba ngingazange ngingene phakathi. Konke okubikwa ukuthi kukhona phakathi lami ngikubonile.
“Umuzi lo ukhanya usumdala sibili, kukhanya angani amafasitela atshontshwe kumnyaka ophelileyo njalo abantwana kubikwa bake baphuma kulolunxiwa bephethe itshukela elomileyo,” utsho njalo.
Ebuzwa ukuthi kungani impahla ezikulelinxiwa zingakakhithiki loba ukudliwa ngumuhlwa uphendule wathi lokhu kungabe kungenxa yokuthi uphahla lokhe lukhona.
Induna uMathema ithe isike yakhuluma labadala besigaba kunye labosiyazi bayicebisa ukuthi impahla lezi kumele zethulwe zigejelwe igodi zifakwe phakathi ligqitshelwe kumbe zifakwe emlindini, umuzi ubusudilizwa.
Induna iqhubekele phambili yathi abadala bathi imizi efana lalo ngenye yezizatho ezibangela ukungani kuhle kwezulu esigabeni yikho nje kufanele udilizwe lempahla zigqitshelwe.
